gaye dinon ka suragh lay kar kidhar say aaya kidhar gaya woh

[intelligent086]

gaye dinon ka suragh lay kar kidhar say aaya kidhar gaya woh
ajeeb manoos ajnabee thaa mujhe to heran kar gaya woh

bus ik motee see chab dikha kar bus ik meethee see dhun suna kar
sitara e shaam ban kay aaya barang khwab seher gaya woh

khushee kee raat ho keh gham ka mausam nazar usay dhondtee hai har dum
woh boo e gul tha keh naghma e jan meray to dil main uttar gaya woh

nah ab woh yaadon ka charhta hai darya na fursaton kee udaas barkha
yoonhee zara see kasak hai dil main jo zakham gehra thaa bhar gaya woh

kuch ab sambhalnay lagee hai jaan bhee badal chala hai rang aasmaa bhee
jo raat bharee thee tal gayee hai jo din kara thaa guzar gaya woh

shikasta pa raah main khara hoon gaye dinon ko bulaa raha hoon
jo qaaflaa mira humsafar thaa misaal e gard safar gaya woh

hawis kee bunyaad per na theraa kisee bhee umeed ka gharonda
chalee zara see hawa mukhaalif ghubaar ban kar bikhar gaya woh

bus ik manzil hai bulhawas kee hazaar rastay hain ahle dil kay
yehi to farq hai mujh main us main guzar gaya main thehar gaya woh

woh meekday ko jalaanay wala woh raat kee neend uraanay wala
yeh aaj kia us ka jee main aayee kay shaam hotay hee ghar gaya woh

woh jis kay shaanay pe haath rakh kar safar kia tu nay manzilon ka
teri gali say na janay kioon aaj sar jhukaaey guzar gaya woh

woh hijr kee raat ka sitara woh hum nafas hum sukhan humara
sada rahay us ka naam piyraa suna hai kal raat mar gaya woh

woh raat ka baynawa musafir woh tera shaair woh tera nasir
teri gali tak to hum nay dekha thaa phir naa janay kidhar gaya woh

Similar Threads:

• Juz qais aur koi na aaya barooai kar
• aashiyaa.N jal gayaa gul_sitaa.N luT gayaa ham qafas se nikal kar kidhar jaaye.nge
• kis moR pe le aaya hameN hijr-e-musalsal
• Sonnay main aaya hai
• bahut dinon ki baat hai