لیپ ائیر کیا ہوتا ہے

**intelligent086** · 02-29-2016, 05:01 PM

لیپ ائیر کیا ہوتا ہے

عامر علی
آج29 فروری ہے اور اس برس کو لیپ ائیر کہا جا رہاہے۔جیسا کہ ہم سب جانتے ہیں کہ عام طور پر سال میں 365 دن ہوتے ہیں ،تاہم کچھ برس ایسے ہوتے ہیں ،جن میں 366 دن ہوتے ہیں، ایسے برس کو ’’لیپ ائیر‘‘ کہا جاتا ہے ۔ لیپ ائیر میں فروری کا مہینہ 28 دن کی بجائے 29 دن پر مشتمل ہوتا ہے اور ایسا 4 برس بعد ہورہا ہے۔ ایسا کیوں ہوتا ہے اور کب سے ہورہا ہے؟ ہوسکتا ہے ،بیشتر افراد کو اس کی وجہ معلوم ہو، مگر جو نہیں جانتے ،وہ جان لیں کہ ہر 4 سال بعد فروری کے مہینے میں ایک اضافی دن یا لیپ کا دن کی وجہ کیا ہے: درحقیقت زمین کا سورج کے گرد گردش کا دورانیہ 365 دنوں کا نہیں بلکہ چوتھائی دن زیادہ ہے، یعنی کہ 365 دن، پانچ گھنٹے، 49 منٹ اور 12 سیکنڈ اور چونکہ زمین سورج کے گرد گردش کرتی ہے، اس لیے موسموں کی تبدیلی کا انحصار بھی زمین اور سورج کے اس گردش پر منحصر ہوتا ہے، اس لیے اگر ہر سال 365 دن رکھیں، تو ہر سال چوتھائی دن کا فرق پڑنے لگتا ہے اور کیلنڈر موسموں سے دور ہونا شروع ہو جاتا ہے۔ اب چونکہ دنیا بھر میں ایسا گریگوری کیلنڈر کو استعمال کیا جاتا ہے، جس میں 365 دن ہے، تو اس فرق کو دور کرنے کے لیے لیپ سیکنڈز اور لیپ سال کے ذریعے گھڑیوں اور کیلنڈر میں زمین اور موسموں سے مطابقت پیدا کی جاتی ہے۔قریباً 45 قبل مسیح میں روم کے بادشاہ جولیس سیزر نے کلینڈروں کی اصلاحات کے لیے ایک کمیشن قائم کیا، جس نے فیصلہ کیا کہ ہر چار سال میں سے ایک سال 366 دنوں کا کیا جائے۔ جولیس سیزر کی موت کے بعد ہر چار سال کے بعد ایک دن کا اضافہ کرنے کی بجائے یہ اضافہ ہر تین سال کے بعد کیا جانے لگا، اس طرح ایک مرتبہ پھر رومن کیلنڈر موسموں سے آگے بھاگنے لگا۔ یہ مسئلہ جولیس سیزر کے بعد آنے والے اصلاح پسند بادشاہ آگسٹس سیزر نے 8 قبل مسیح میں حل کرنے کی کوشش کی اور اس طرح یہ سلسلہ 16 ویں صدی تک چلتا رہا۔16 ویں صدی میں پاپ گریگوری نے کلینڈر میں تبدیلی کر کے یہ مسئلہ پھر حل کرنے کی کوشش کی اور ایک کمیشن قائم کیا گیا،جس میں یہ طے پایا کہ ہر 400 سال میں 100 لیپ ائیر ہونے کی بجائے 97 لیپ ائیر ہوں گے۔ لیپ سیکنڈ چند سالوں بعد سورج اور چاند کی کشش کی وجہ سے زمین کی گردش میں ایک سیکنڈ کا فرق پڑ جاتا ہے، اس فرق کو پورا کرنے کے لیے ماہرین مخصوص اوقات میں گھڑی میں ایک لیپ سیکنڈ کا اضافہ کرتے ہیں۔ یہ اضافہ عموماً 30 جون یا 31 دسمبر کو 11 بج کر 59 منٹ اور 60 سکینڈ یو ٹی سی پر کیا جاتاہے۔ 1971 سے لیکر اب تک 26 لیپ سیکنڈ بڑھائے جا چکے ہیں اور 30 جون 2015ء کو 26 واں لیپ سیکنڈ بڑھایا گیا تھا۔ لیپ ائیر بگ 2009ء کے آغاز میں مائیکروسوفٹ کو خاصی شرمندگی کا سامنا کرنا پڑا جب دنیا بھر سے اس کے میوزک پلیئر زیون کے 30 گیگابائٹ والے ورژن کے یکدم ناکارہ ہونے کی خبریں موصول ہونے لگیں۔ چند گھنٹے بعد مائیکروسوفٹ کے ترجمان نے اس بات کی تصدیق کر دی کہ 30 گیگابائٹ والے زیون میوزک پلیئر میں لیپ ائیر کے اختتام پر تاریخ بدلنے سے گڑبڑ پیدا ہو جاتی ہے۔ اس کا حل مائیکروسوفٹ نے یہ تجویز کیا ہے کہ انتظار کیا جائے۔ صرف ایک دن بعد زیون کا انٹرنل کلاک درست کام کرنے لگے گا، لیکن اس سے پہلے زیون کی بیٹری نکال کر اسے ڈسچارج کرنا ضروری ہوگا۔ امریکی صدارتی انتخابات کے دوران یہ مشہور ہو گیا تھا کہ باراک اوباما کے پاس زیون پلیئر ہے۔ ان خبروں نے اتنا زور پکڑا کہ باراک اوباما کے ترجمان کو وضاحت کرنا پڑی کے اوباما آئی پوڈ استعمال کرتے ہیں۔ اگر آپ کی پیدائش 29 فروری کی ہو؟ جو لوگ 29 فروری کو ہوتے ہیں، انہیں اپنی سالگرہ منانے کے لیے 28 فروری یا یکم مارچ کا انتخاب کرنا پڑتا ہے جبکہ کچھ 29 فروری پر ہی برقرار رہتے ہیں۔ کچھ حلقوں کے خیال میں 28 اور 29 فروری کی درمیانی شب کے بعد پیدا ہونے والوں کو اپنی سالگرہ 28 فروری کو منانی چاہیے ، جو لوگ 29 فروری اور یکم مارچ کی درمیانی شب سے کچھ پہلے پیدا ہو، وہ یکم مارچ کو ہی اپنا یوم پیدائش مان لیں ۔ ٭…٭…٭