مالٹا… موسمِ سرما کا ایک خاص تحفہ

ڈاکٹر محمد رشید
سندھی: مالٹو انگریزی : Orange مالٹا مزاج کے لحاظ سے سردتر ہے۔ اس کا رنگ پختہ حالت میں سرخی مائل زرد، ذائقہ قدرے شیریں اور ترش ہوتا ہے۔ اس کی مقدار خوراک دو سے چھ عدد ہے۔ اس کے درج ذیل فوائد ہیں۔ 1۔ مالٹا مفرح اور خوش ذائقہ پھل ہے۔ 2۔ یہ ہاضم ہوتا ہے اسے کھاتے وقت کالی مرچ اور نمک کا اضافہ کرنے سے اس کا ذائقہ اور بھی مزے دار ہو جاتا ہے۔ 3۔ خون پیدا کرتا ہے۔ 4۔ ہائی بلڈ پریشر کیلئے مفید ہے۔ 5۔ بدہضمی کو دور کرتا ہے۔ 6۔ جگر کی خرابی میں مالٹے کا استعمال انتہائی سودمند ہوتا ہے۔ 7۔ نزلہ، زکام اور کھانسی میں مالٹے کا استعمال نقصان دیتا ہے۔ 8۔ جگر کی گرمی کو دور کرتا ہے۔ 9۔ یہ پیاس بجھاتا ہے۔ 10۔ طبیعت کو صاف کرتا ہے اور طاقت بخشتا ہے۔ 11۔ سرخ مالٹے فوائد کے اعتبار سے عام مالٹے سے زیادہ مفید ہوتے ہیں۔ 12۔ خون کی خرارت کو کم کرتا ہے۔ 13۔ پھوڑے، پھنسیوں میں مالٹے کا رس بغیر نمک مرچ پینا مفید ہوتا ہے۔ 14۔ امراضِ بلغمی مثلاً دمہ وغیرہ میں مالٹے کا استعمال نقصان دہ ہے۔ 15۔ یرقان اور بخار میں اس کا استعمال مفید ہوتا ہے۔ 16۔ یہ پھل پندرہ بیس روز تک پڑا رہنے سے خراب نہیں ہوتا۔ 17۔ اس کا چھلکا چہرے کا رنگ نکھارتا ہے۔ اس کا طریقہ یوں ہے کہ مالٹے کے چھلکے کے اندرونی سفید حصے کو صاف کر کے رگڑ لیں اور تیل سرسوں ملا کر رات کے وقت چہرے پر لیپ کر کے سو جائیں، صبح سویرے اٹھ کر کسی اچھے صابن سے منہ دھو لیں، صرف چھ دن کے استعمال سے چہرے کے تمام داغ دھبے اور چھائیاں دور ہو جائیں گی۔ 18۔ مالٹے کے چھلکے کے صرف زردی والے حصے کو ہی اگر رات کو سونے سے قبل چہرے پر مل لیا جائے اور یہ عمل پانچ منٹ تک جاری رہے تو مذکورہ بالا فائدہ چند ہی روز کے استعمال سے ہو جاتا ہے۔ 19۔ اگر ہاتھ پائوں کے تلوے جلتے ہوں یعنی ان سے گرمی نکلتی محسوس ہو تو چھ عدد مالٹے چھیل کر ان پر نمک اور کالی مرچ لگا کر اوس میں رکھیں، صبح نہار منہ کھانے سے یہ مرض دور ہو جاتا ہے۔ ٭…٭…٭