kuchh raaz ki baateN haiN, unheN raaz hi rakhiye
laazim nahiiN har baat ki dunya ko Khabar ho

har moRh pe pahra hai raqeeboN ka to aaKhir
ai jaan-e-jahaaN, tujh se mulaaqaat kidhar ho?

kyaa lutf rahe Hashr meN ay jaan-e-tamannaa
tuu saamne ho, aur mira deedah-e-tar ho

ik vaada-e-farda ka mazaa Khuub hai lekin
paabandi-e-ulfat ka taqaazah bhi agar ho

luuTaa hai muHabbat meN tiri fitnah-gari ne
phir kyuuN na tire ishq meN dil zer-o-zabar ho?

duniya ne to mash'Huur kiyaa mere junooN ko
ai kash! tujhe bhi miri weHshat kii Khabar ho


Similar Threads: