ہوشیار! یہ ایپ ہے خطرناک

**Aseer e Wafa** · 06-29-2015, 02:35 PM

مختلف ضروریات کے تحت ایپس ڈاؤن لوڈ کی جاتی ہیں، مگر بہت سے لوگ نہیں جانتے کہ بعض ایپلی کیشنز کی ڈاؤن لوڈنگ خطرناک ثابت ہوسکتی ہے، کیوں کہ انھیں ڈاؤن لوڈ کرنے سے ڈیٹا چوری ہوسکتا ہے۔

حال ہی میں سامنے آنے والی ایک ایپلی کیشن بھی اسی نوعیت کی ہے۔ ’’ان فرینڈ الرٹ‘‘ کے نام سے بنائی جانے والی یہ ایپ آپ کو آگاہ کرتی ہے کہ کو کس نے آپ کو فیس بک پر ان فرینڈ کردیا ہے۔ اس ایپ کے بارے میں یہ حقیقت سامنے آئی ہے کہ اس کے ذریعے اسے استعمال کرنے والے یوزر کا ڈیٹا حاصل کرلیا جاتا ہے۔ یوزر کو یہ بتانے والی یہ ایپلی کیشن کہ اسے کس نے اپنی ایف بی فرینڈ لسٹ سے خارج کردیا ہے، بلامعاوضہ ہے، اس لیے یوزرز کے لیے مزید پُرکشش ہے۔

یہ ایپ اپنی سہولت فراہم کرنے سے پہلے آپ سے سائن ان ہونے کو کہتی اور آپ کا پاس ورڈ معلوم کرتی ہے۔ اس کا انکشاف کرتے ہوئے انٹرنیٹ سیکیوریٹی فرم MalwareBytes کا کہنا ہے کہ اس ایپ کو استعمال کرنے والے یوزر کی login credentials (آئی ڈی اور پاس ورڈ) براہ راست فیس بک کو نہیں بھیجی جاتی، بل کہ yougotunfriended.com کو بھیجی جاتی ہے۔ ’’ان فرینڈ الرٹ‘‘ نامی یہ ایپ اشتہارات ڈسپلے کرتی ہے اور استعمال کنندہ یوزر کے کمپیوٹر میں نقصان دے سوفٹ ویئر بھی انسٹال کرسکتی ہے۔ مزید خطرناک بات یہ ہے کہ یہ ایپلی کیشن فیس بک کی ایپس لسٹ میں نظر نہیں آتی، چناں چہ آپ اسے استعمال میں لاکر بہ آسانی بھول جاتے ہیں کہ کوئی آپ کی آن لائن سرگرمیوں پر نظر رکھے ہوئے ہے۔

آن لائن سیکیوریٹی کے ماہرین کا کہنا ہے کہ اس ایپلی کیشن کو استعمال کرنے والے یوزر اس سے نجات حاصل کرلیں اور اپنا پاس ورڈ تبدیل کرلیں۔ اس ایپلی کیشن کی جگہ فیس بک کے صارفین ان فرینڈ ہونے سے آگاہی کے لیے اس طرح کی دیگر ایپس استعمال کرسکتے ہیں۔