اے پیاری ماں!

**intelligent086** · 11-19-2014, 09:26 PM

اے پیاری ماں!
(جَزَاکِ اﷲُ خَیْرًا)
”والدہ ، اُم ، امی ، مادر ، ماں“ ترے ہی نام ہیں
تجھ پہ سب قربان ، روح و جاں ترے ہی نام ہیں

نو مہینے تک اٹھا کر مجھ کو تو چلتی رہی
میری ننھی جان تیرے پیٹ میں پلتی رہی

تو ہی سب کچھ ہے مری جاں کے لیے اے پیاری ماں!
جانِ جاں، جانِ جہاں ،جانِ جہانانِ جہاں

دل میں ہے تیری محبت کا سمندر موج زن
میری جاں ، میرا جگر ، میری تمنا ، میرا تن

ہو فدا تجھ پر ، تری قربانیوں پر میری جاں
میری ننھی جاں پہ تو نے دیں کئی قربانیاں

خادموں سے بڑھ کے تو رکھتی رہی میرا خیال
آگے پیچھے گھومتی کہتے ہوئے ’’اے میرے لعل!‘‘

رونا آتا ، جب کوئی بھی شے نہ بھاتی تھی مجھے
کام سارے چھوڑ کر تو چپ کراتی تھی مجھے

تیرا دامن میرا بستر ، گود تیری میرا گھر
تو تھی میرا کل جہاں اور میں تری جانِ جگر

سردی لگتی جب مجھے ، تو میرا ہوتی تھی لحاف
میرے ننھے کپڑے کرتی تھی ’’لگن‘‘ سے پاک صاف

دیکھ کر ناپاک مجھ کو تو دھلاتی تھی مجھے
جاگ کر خود لوریاں دے کر سلاتی تھی مجھے

گھومتی تھی ہر جگہ مجھ کو اٹھا کر گود میں
چاشنی اخلاص کی پائی ہے تیرے دودھ میں

میری ’’اُوں آں‘‘ سنتے ہی بے چین ہوجاتی تھی تو
میرا رونا دیکھ کر یک دم ہی روجاتی تھی تو

تھی تری گودی ہی میری سب سے پہلی درس گاہ
’’اللہ اللہ‘‘ ، ’’امی امی‘‘ میں نے سیکھا جس جگہ

کچھ نہ آتا تھا ، فقط آتا تھا اک رونا مجھے
بیٹھنا مجھ کو سکھایا ، پھر کھڑا ہونا مجھے

پھر سہارا دے کے تو مجھ کو چلانے لگ گئی
اے مری امی! تو میری تربیت میں تھک گئی

چلتے چلتے لڑکھڑاہت آگئی مجھ میں کبھی
تو لپک کر ہاتھ پھیلائے مِری جانب بڑھی

مجھ کو گرتے دیکھ کر فوراً نکلتی تیری چیخ
چیخ تیری سن کے فوراً ہی نکلتی میری چیخ

میری سیدھی سادی باتوں پر بھی ہنس جاتی تھی تو
میرے شور و غل کو سن کر بھی خوشی پاتی تھی تو

تیرے سر میں درد ہوتا یا تجھے ہوتا بخار
میری خاموشی تجھے کردیتی پھر بھی بے قرار

آہ! وہ تیرا سویرے ہی سویرے جاگنا
میرا سوتے رہنا ، تیرا منہ اندھیرے جاگنا

وہ محبت سے ترا مجھ کو کرانا ناشتہ
وہ لگاوٹ سے بتانا مجھ کو میرا راستہ

شام دروازے پہ تکتے رہنا میرا راستہ
کچھ نہ ہوجائے کہیں مجھ کو خدا نہ خواستہ

ّّآہ!! اے امی مری! اے میری جانِ دلربا!
گلشنِ بچپن کے اندر تو تھی اک بادِ صبا

میں نے جو خواہش بھی کی تو نے وہ پوری کرہی دی
کوئی مجبوری ہو ، ورنہ تو نے فوری کرہی دی

زندگی کی راہ میں یہ ننھی جاں چلتی رہی
تیری ممتا کے شجر کے سائے میں پلتی رہی

آندھی ہو ، طوفان ہو ، کوئی مصیبت آئی ہو
ہے نہیں کوئی پناہ جو تجھ سے بہتر پائی ہو

کیسے بھولوں آج تیرے دل کے سب گوشوں کو میں
تیری ان نازک ، مگر مضبوط آغوشوں کو میں

وقت نے پھر بدلی کروٹ ، دورِ ثانی آگیا
مجھ میں طاقت آگئی ، تجھ پر بڑھاپا چھاگیا

پہلے تیری گود تھی اب میرے بازو آگئے
نیکیوں کا بدلہ دینے کے ترازو آگئے

آگئی میرے ذہن میں اک حدیثِ پاک بھی
’’ماں کے قدموں کے تلے جنت ہے‘‘ تو بھی پاکبھی

حج کرایا ماں کو کندھے پر بٹھا کر ایک نے
ماں کے احسانوں کا بدلہ دینا چاہا نیک نے

اپنا قصہ اس نے سب ابنِ عمر سے جب کہا
سن کے بولے ’’ایک شب کا بھی نہیں بدلہ ہوا‘‘

کیوں حلیمہ کا ادب کرتے رہے پیارے نبی
سہ گنہ حق تیرا زیادہ رکھ دیا والد پہ بھی

اے دل و جاں سے بھی زیادہ میری پیاری پیاری ماں!
ہے دعا تیرے لیے قرآں میں ’’رَبِّ ارْحَمْھُمَا‘‘

’’اُعْبُدُوا اﷲ‘‘ حکم ہے واضح ہمیں قرآن کا
اور حکمِ رب ہے پھر ماں باپ کے احسان کا

میری خاطر تو نے کیا کیا سہہ لیا اے میری ماں!
حمل، وضع حمل، ارضاعِ لبن، تہذیبِ جاں

رات دن میرے لیے رب سے دعا کرتی رہی
ہر گھڑی میری محبت کا ہی دم بھرتی رہی

میری بیماری میں تیری نیند اڑجاتی تھی کیوں؟
’’ہائے‘‘ میری سن کے چلتے چلتے مڑجاتی تھی کیوں؟

صبح کو منزل بتا پڑھ پڑھ کے دم کرتی تھی کیوں؟
رات دن میری لیے ’’یٰس‘‘ ختم کرتی تھی کیوں؟

مجھ کو آنے میں اگر تاخیر ہوجاتی کبھی
بدحواسی وہ تری ہے یاد مجھ کو آج بھی

مجھ کو کھانا دے کے اپنے کام کرسکتی تھی تو
پاس میرے بیٹھ کر یک ٹک مجھے تکتی تھی تو

کون سا جذبہ ہے تجھ میں، کیسا آخر جوش ہے؟
دیکھ کر تیرا جنوں عقلِ جہاں مدہوش ہے

کوئی قربت بھی غَرَض سے اس جگہ خالی نہیں
ایک تیری ہی ہے الفت جو غرَض والی نہیں

گرمیوں میں فجر کا تو من کو بھاتا روپ ہے
سردیوں میں ظہر کی تو تن کو بھاتی دھوپ ہے

دل کی ہلچل تیری گویا عصر اور مغرب کا بین
ہے تری خاموشی میں رازِ سکوتِ مغربین

کام میرے کرنا تیرا سب سے پہلا کام ہے
’’مان‘‘ لیتی ہے ، جبھی تو ’’ماں‘‘ ہی تیرا نام ہے

میرے یہ الفاظ تیرے سامنے سب تنگ ہیں
تیری عظمت کو بتانے کے لیے بے ڈھنگ ہیں

تیری الفت ، تیری عظمت جانتا ہے بس خدا
میں تو اتنا جانتا ہوں ، میرا سب تجھ پر فدا

مجھ سے تیرے حق میں کوئی سی بھی گستاخی ہوئی
کوئی چھوٹی سی بھی غلطی ، کوئی کوتاہی ہوئی

آہ بس اپنا سمجھ کر مجھ کو کردے تو معاف
اپنا رِستا خوں سمجھ کر کردے آنچل سے تو صاف

جس قدر رب نے رکھی ہیں تجھ میں میری الفتیں
تیری خدمت میں رکھیں میرے لیے ہیں برکتیں

حق بھی تیرا میرے ذمے اس قدر رکھا بڑا
حق ہو تیرا ہر ادا ، یہ امتحاں ہے اک کڑا

اے خدا! مجھ کو تو اپنے فضل سے توفیق دے
حق جو مجھ پر ماں کا ہے، اس کی دلی تصدیق دے

ماں کے قدموں کو بنادے بس تو میری سرزمیں
زندگی گزرے یہیں ، پھر روح بھی نکلے یہیں

ہر گھڑی ماں کی ہی خدمت اب رہے پیشِ نظر
ماں کے قدموں ہی میں اب مولیٰ! رہوں میں عمْربھر

دل کی گہرائی سے نکلی ہے اساؔمہ کی دعا
خدمتِ مادر کی تو توفیق اسے کردے عطا
محمد اسامہ سرسری