میری زباں سے پھوٹے ہیں، سو میرے ہیں
زہریلے کانٹے کس سے منسوب کروں
Printable View
میری زباں سے پھوٹے ہیں، سو میرے ہیں
زہریلے کانٹے کس سے منسوب کروں
منافقت نے جلال چہروں پہ لکھ دیا ہے
وفا نے حزن و ملال چہروں پہ لکھ دیا ہے
اسی لئے تو میں کہہ رہا تھا کہ کچھ نہ کہنا
صدا نے اندر کا حال چہروں پہ لکھ دیا ہے
خلا میں کھوئی، خموش، خستہ خمار نظریں
کسی نے میرا خیال چہروں پہ لکھ دیا ہے
یقین و امید و بیم و خوف و گماں نے مل کے
جواب جیسا سوال چہروں پہ لکھ دیا ہے
ہوا کچھ ایسا کہ وسعتِ قلب کی کمی نے
منافرت کا ابال چہروں پہ لکھ دیا ہے
بے قراریِ جاں، جو تو نہ رہی
میں وہ گل ہوں کہ جس میں بو نہ رہی
ہو گیا بے نیازِ سینہ دل
جامے کو حاجتِ رفو نہ رہی
بجھ گئے شوق کے شرارے بھی
برقِ ناوک بھی تند خو نہ رہی
نا امیدی سی نا امیدی ہے
آرزو کی بھی آرزو نہ رہی