رُت ھے ساون کی
اور صُبح سے تیز بارش
مِرے گھر کی چھت پر بجے جا رھی ھے
مگر کچی مٹی کی چھت
جب یہاں سے وھاں تک ٹپکنے لگی ھے
تو ٹپکا، مِرے گھر کے مٹی لِپے فرش کو
چَھلنی چَھلنی کیے دے رھا ھے
ایک ٹپکے کے نیچے کٹورا جو رکھا
تو جیسے کوئی ساز بجنے لگا
ایک ٹپکے نے ایک اور برتن میں طبلہ بجایا
سِتار ایک برتن میں کُچھ گُنگنانے لگا
گھر کے ایک ایک برتن کو
ٹپکوں کے نیچے رکھے
اپنے کمرے کے گوشے میں دُبکا ھوُا
ساز و آواز کا ایک جادوُ جگائے
مزے لے رھا ھوُں !
احمد ندیم قاسمی
