نیپال: ایئرپورٹ کے قریب مسافر طیارے کو حاد

نیپال کے کھٹمنڈو ایئرپورٹ کے قریب بنگلہ دیش کا مسافر طیارہ گر کر تباہ ہوگیا، جس کے نتیجے میں 27 افراد کے ہلاک ہونے کی اطلاعات ہیں۔
غیر ملکی خبر رساں اداروں کی رپورٹ کے مطابق کھٹمنڈو ایئرپورٹ کے قریب لینڈنگ کے دوران بنگلہ دیش کا مسافر طیارہ حادثے کا شکار ہوگیا، جس میں 67 مسافروں سمیت 4 عملے کے ارکان شامل سوار تھے۔
اس حوالے سے حکومتی ترجمان ناراین پرساد دوادی نے غیر ملکی خبر رساں ادارے کو بتایا کہ ’ ہم ملبے سے لاشوں اور زخمیوں کو نکالنے کی کوشش کر رہے ہیں۔
اس کے ساتھ ساتھ ایک اور عہدیدار نے بتایا کہ اب تک 20 زخمیوں کو ہسپتال متقل کردیا گیا۔
ایئرپورٹ ترجمان پریم ناتھ ٹھاکر نے بتایا کہ غیر ملکی جہاز میں 67 مسافر اور 4 عملے کے لوگ سوار تھے جبکہ پولیس اور فوج کی جانب سے امدادی کارروائیاں جاری ہیں اور ملبے تلے پھنسے افراد کو نکالا جارہا ہے۔
حادثے کے بارے میں ایک اور عہدیدار نے نام ظاہر نہ کرنے کی شرط پر بتایا کہ یہ پرواز بنگلہ دیشی دارالحکومت ڈھاکہ سے آرہی تھی کہ لینڈنگ کے دوران جہاز میں آگ لگ گئی اور وہ حادثے کا شکار ہوگیا۔
اس بارے میں جب بنگہ دیشی ایئرلائن کے دفتر میں رابطہ کیا گیا تو ایک ملازم نے بتایا کہ اس بارے میں’ کوئی بات کرنے کو تیار نہیں ہے اور نہ ہی اس بارے میں کوئی مزید تفصیلات ہیں لیکن ایک برا واقعہ رونما ہوا ہے۔
دوسری جانب اس واقعے کے فوری بعد فیس بک پوسٹ کی گئی ویڈیوز میں رن وے کے قریب دھویں کے بادل اٹھتے دیکھا گیا جبکہ ایمرجنسی گاڑیوں کی جانب سے امدادی کارروائیاں کرتے ہوئے دیکھا گیا۔
واضح رہے کہ حالیہ چند برسوں میں نیپال میں فضائی حادثوں میں اضافہ ہوا ہے جس کے باعث اس کی سیاحتی صنعت پر بھی کافی اثر پڑا ہے۔
نیپال کی غیر محفوظ فضائی تحفظ کا ذمہ دار ناکافی دیکھ بھال، غیر تجربہ کار پائلٹس اور ناقص انتظام کو قرار دیا جاتاہے۔