نعت کملی والے دی
صوفی شاعر حضرت غلام حضور شاہ
پ 1907 و 1988
میرے سوہنے کملی والے دا وچ دنیا شان نرالہ اے
دنیا دے ہر چپے تے سوہنے چا کیتا دین اجالا اے
دن راتیں پڑھاں کلمے نوں ایہو مرضی میری کہندی اے
جدوں کلمہ پڑھ لواں سوہنے دا ٹھنڈ کلیجے پیندی اے
میں اسدا کلمہ پڑھدا ہاں اتوں ذات مولا دی کہندی اے
میرے مولا نوں عشق ستایا کملی والے نوں یار بنایا سو
اوہدی شان دودھا کے تے پیار نال اوہدے چا پایا سو
لامکانی لکیا چھپیا اوہنوں نال شونق نظارہ کرایا سو
جد رل دونویں بیٹھے پچھیا دس مرضی تیری کیہ کہندی اے
تیرے واسطے دونویں جہان بنے اے ذات مولا دی کہندی اے
عرش فرش تے ہر وسوں گیت اوس سوہنے دی گاندی اے
میری امت ساری بخش دیویں ہور چیز دی مینوں لوڑ نئیں
تو حاکم کل حاکماں دا تیرے گھر وچ کوئی تھوڑ نئیں
کر عرض میری منظور مولا ایہو مرضی میری کہندی اے
جدوں دکھ سن ناں دوزخاں دے اہدوں جان میری گھبریندی اے
جدوں لنگاں گے پل صراط اتوں اودں ہتھ کیتی نیکی کم آندی اے
عرشوں یار نوں یار نے ودیا کیتا یار آ فرش تے ڈیرا لایا سی
میرے سوہنے کملی والے نیں آ کے ڈنکا دین دا وجایا سی
اس دی کملی خوب نرالی اے گناہگاراں دے عیب چپھاندی اے
میرے بخشیں مولا گناہ سارے راتیں اکھیں نیند ناں پیندی اے
اک اکھ جے میتھوں رس پیوے دوجی اکھ پچھوتاوے روڑندی اے
ایہہ دنیا کوڑ پسارا اے کیوں الجھن دے وچ پھسنا ایں
تینوں لالچ کلاوا پا لیا اے حق سچ توں توں پیا نسنا ایں
عمر تیری وچ پانی بلبلا رہندی کہندی دلیلاں وچ گووندی اے
کر لے توں عمل چنگے تینوں قبر پئی واجاں مریندی اے
لاتقنطو دی ہے آس مینوں جندڑی من رحمتہ اللہ پئی جاپیندی اے
کیوں بھلیا پھریں ایانیا توں موت آوازاں پئی دیندی اے
غلام حضور شاہ کیہ تینوں دسے ایہہ قرآن وچ آیا اے
ایہہ رمز تئیں نئیں پائی جہڑی کھیڈ اوس رچائی اے
پڑھ کلمہ بندیا دن راتیں ہر مرض دی ایہو دوائی اے
لاتقنطو وی دسیو ای من رحمتہ اللہ وی فرمایا ای
سانوں ہو گئی تسلی جے ساڈے امید دلاں وچ رہندی اے
سانوں جنت وچ پنچا دے گا تیری رحمت آوازاں دیندی اے
دوزخوں وی بچا لیے گا خوشخبری ایہہ آیت پئی دیندی اے
کل غوثاں قطباں ولیاں توں تیری شان اچیری سنیندی اے
میرے سوہنے کملی والے دی صفت مولا دی ذات کریندی اے
تیرے حکم بن نہ قطر ہلے میری مرضی دی کیہ جرآت پیندی اے
