دعوت اور مزاحمت
نبی کریم صلی اللہ علیہ وسلم کی دعوت کا آغاز ہوا تو مخالفت کا ایک طوفان اٹھ کھڑا ہوا۔ ایسا نہیں تھا کہ مکہ میں اہل نقل کی پہچان کرنےوالے لوگ نہیں تھے۔عرب قیافہ شناسی میں یدِ طولیٰ رکھتے تھے۔ چہرہ دیکھ کر کسی انسان کے کردار کی پوری تصویر کشی کردیتے تھے بلکہ اسکے حسب نسب کے بارے میں تقریباً صحیح اندازا قائم کر لیتے تھے۔کسی انسان یا جانور کا نشان قدم دیکھ لیتے تو ان پر حالات وواقعات بڑی حد منکشف ہوجاتے۔
حضور اکرم صلی اللہ علیہ وسلم کی دعوت جہاں عام لوگوں کو اپنی دیر بند روایات سے انحراف نظرآرہی تھی۔وہیں پر اجارہ داروں کا ()وعیار ذہن اسے اپنی بالادستی کے لیے خطرہ سمجھ رہا ہے۔
اپ بھی ظلمات فروشوں کو گلہ ہے تجھ سے
رات باقی تھی کہ سورج نکل آیا تیرا
ایک دن اخنس بن شریق نامی ایک کافر نے ابو جہل سے پوچھا اے ابو الحکم تم نے محمد (صلی اللہ علیہ وسلم) سے جو (کلام)سنا ہے اسکے بارے میں تمہاری کیا رائے ہے۔ ابو جہل نے کہا ”میں نے کیا خاک سنا ہے؟حقیقت تو یہ ہے کہ ہمارا اور بنو عبدمناف کا اس با ت پر دیرینہ جھگڑا تھا کہ قوم کا سردار کون بنے گا۔اس شرف اور منصب کو حاصل کرنے کیلئے انہوں نے بھی دستر خوان آراستہ کرلیا اور ہر غریب ومسکین کو کھانا کھلایا اور ہم نے بھی اس سے سبقت لے جانے کیلئے غربا کی ضیافت کا اہتمام کیا ۔انہوں نے بھی لوگوں کے بوجھ اٹھائے اور ہم نے بھی ، انھوں نے بھی فیاضی سے کام لیا اور ہم نے بھی سخاوت سے کام لیا۔اور جب ہم مقابلہ کے دوگھوڑوں کی طرح ہوگئے ہیں۔تو انھوں نے اچانک اعلان کردیا ہے کہ ہم میں سے ایک شخص کو نبوت مل گئی ہے۔اور اس کے پاس آسمان سے وحی آتی ہے۔ (اب ہم کیا کریں؟) ہم یہ دعویٰ کیسے کرسکتے ۔قسم بخدا ہم تو اس پر ہر گز ایمان نہیں لائیں گے اور نہ اس کی تصدیق کریں گے۔ (سیر ت ابن ہشام)اسی طرح کی ضد،ہٹ دھرمی اور تعصب کا دوسرے سرداران قریش بھی شکار تھے۔ ایسے میں جبکہ پوری قوم ایک طرف تھی اور حضور اکرم صلی اللہ علیہ وسلم تنہا، ایک طرف،کارِ دعوت کا آگے بڑھنا کوئی آسان کام نہ تھا۔ اللہ رب العزت نے اپنے پیارے محبوب کو تین ایسے موثر ہتھیاروں سے نوازا تھا جن کا آپ کے مخالفین کے پاس کوئی جواب نہ تھا۔
٭آپکے پاکیزہ بے مثال اور بے داغ کردارو عمل کا معجزہ ٭آپ کے قلبِ منیر پر نازل ہونی والی بے مثال ولازوال کتاب ٭آپکے لب انور سے اداءہونےوالے، دل کی گہرائیوں میں اترنے والے پاکیزہ کلمات جو ،سادگی ،سلاست ،بلاغت اور معنویت سے بھر پور ہوتے تھے۔اور جن سے جھلکتا ہوا خلوص آپ کے مخاطب کو اپنی تاثیر کی گرفت میں لے لیتا۔
جن درختوں کی جڑیں دل میں اتر جاتیں ہیں
ان کا آندھی کی درانتی سے بھی کٹنا مشکل
علامہ رضا الدین صدیقی
***
