کلام خواجہ غلام فرید

کلام خواجہ غلام فرید

http://dunya.com.pk/news/special_fea...RBNVaKZ1V-.jpg

آپے اَپناں سُونہاں کِیتو کِرہوں قطاریو نال نہ نِیتو کَیں دُھوتی برمایو وے یار حِلّ لغات: آپے، آپ ہی۔ سُونہاں، واقف۔ کرہوں، اونٹ۔ قطاریو، اونٹ کو قطار میں شامل کیا۔ نال نہ نیتو، ہمراہ نہ لیا۔ دُھوتی، چغل خور۔ برمایو، ورغلایا۔ بھڑکایا۔ ترجمہ: ’’محبوب! تو نے خودہی مجھے اپنا واقف بنایا۔ پھر اپنا اونٹ قافلے میں قطار کر چلدیا۔ اور مجھے ہمراہ نہ لیا۔ خدا معلوم تجھے کس چغلخور نے میرے خلاف بھڑکا دیا ہے۔‘‘ یار مُٹھی کُوں ڈِترو رولا ساڑیو، کِیتو، کیری کولا تَتڑی کُوں کیوں تایو وے یار حِلّ لغات: ساڑیو، جلایو۔ کیری، خاکستر۔ راکھ۔ تایا، (تایو) تپایا۔ (تُونے تپایا) ترجمہ: ’’اے محبوب! تو نے مجھ بد قسمت کو آوارہ اور سرگرداں کر دیا۔ اور جلا کر راکھ اور کوئلہ کر ڈالا میں تو پہلے سے ہی سوختہ جاں اور کبیدۂ خاطر تھی تو نے برباد کر دیا۔‘‘ آپے شہر بھَنبور ڈوں آیوں یاری لا کر چھوڑ سِدھایوں مُفتاں کُوڑ کمایو وے یار حِلّ لغات: شہر بھنبور، سسی کا شہر۔ سِدھا یوں، تُو رخصت ہو گیا۔ مُفتا، مُفت میں۔ بلاوجہ۔ کُوڑ کمایو، تُو نے دَغا کمایا۔ دھوکا دیا۔ ترجمہ: ’’اے محبوب ! تم خود ہی تو شہر بھنبور کی طرف آئے تھے۔ اور پھر مجھے اپنا عاشق بنا کر واپس چلے گئے۔ مجھ سے بلاوجہ دھوکا کیا۔‘‘ یار فرید کڈاں سنبھلیسی سِہجوں سَڈ کر کول بلھیسی جے وَت بَخت بھِڑا یو وے یار حِلّ لغات: کڈاں، کب۔ سنبھلیسی، سنبھالے گا۔ سِہجوں، خوشی خوشی۔ سَڈکر، بُلا کر۔ کول بلھیسی، پاس بٹھائے گا۔ جے وَت، اگر۔ بخت بھِڑایو، بخت نے ساتھ دیا۔ ترجمہ: ’’ اے فرید! وہ دن کب آئے گا۔ جب محبوب مجھے یاد کرے گا۔ اور اگر بخت نے یاوری کی تو خوشی خوشی بُلا کر پاس بٹھائے گا!‘‘ اس بند سے پتہ چلتا ہے کہ دوست کا ملنا کوشش پر موقوف نہیں۔ اگر بخت یاد رہو تو مل جاتا ہے۔ خواہ ریاضت کرے یا نہ کرے۔ کئی بار ایسا ہوا ہے کہ عاشق محو خواب ہے۔ اور دوست اس کے پاس آ جاتا ہے۔ اور کسی وقت جاگنے والے کو بھی نہیں ملتا۔ پردیس ڈَہوں دِیداں اَڑیاں وے یار ساڈیاں وطن کنُوں دِلیں سَڑیاں وے یار حِلّ لغات: ڈہُوں، طرف۔ دِیداں اَڑیاں، نگاہیں لگی ہوئی ہیں۔ سَڑیاں، جل گئیں۔ ترجمہ: ’’اے محبوب! ہماری نگا ہیں پردیس جانے والے محبوب کی طرف لگی ہوئی ہیں۔ اور دل وطن سے بیزار ہو گیا ہے!‘‘ وطن کی دو قسمیں ہیں۔ ایک وطن اصلی اور دُوسرا وطن اقامت، پردیس میں جہاں مسافر مقیم ہو جائے اُسے وطنِ اقامت کہتے ہیں اور جو اس کا اصلی گھر ہو اُسے وطن اصلی کہتے ہیں۔اصلی گھر ایک تو وہ ہے جہاں آدمی رہتا ہو اور اُس کا خاندان بھی رہتا ہو۔ دُوسرا اصلی وطن ہر شخص کا مقامِ احدیث ہے۔ یعنی بیرنگی۔ہر رنگ کا وطن بیرنگی ہے۔ لہٰذا اس شعر کا باطنی مطلب یہ ہوگا کہ ہم اپنے اصلی وطن مقام احدیث (بیرنگی) کو چھوڑ کر یہاں عالمِ شہادت میں آکر پھنس گئے ہیں۔ و ہ شخص بڑا ہی خوش نصیب ہے جو سیر نزولی کے بعد سیر عروجی کی منزلیں طے کر کے اپنے اصلی وطن (مقامِ احدیث) میں پہنچ جائے۔