سب کہاں؟ کچھ لالہ و گل میں نمایاں ہو گئیں
۔
سب کہاں؟ کچھ لالہ و گل میں نمایاں ہو گئیں
خاک میں کیا صورتیں ہوں گی کہ پنہاں ہو گئیں!
یاد تھیں ہم کو بھی رنگارنگ بزم آرائیاں
لیکن اب نقش و نگارِ طاقِ نسیاں ہو گئیں
تھیں بنات النعشِ گردوں دن کو پردے میں نہاں
شب کو ان کے جی میں کیا آئی کہ عریاں ہو گئیں
قید میں یعقوب نے لی گو نہ یوسف کی خبر
لیکن آنکھیں روزنِ دیوارِ زنداں ہو گئیں
سب رقیبوں سے ہوں ناخوش، پر زنانِ مصر سے
ہے زلیخا خوش کہ محوِ ماہِ کنعاں ہو گئیں
جُوئے خوں آنکھوں سے بہنے دو کہ ہے شامِ فراق
میں یہ سمجھوں گا کہ شمعیں دو فروزاں ہو گئیں
ان پری زادوں سے لیں گے خلد میں ہم انتقام
قدرتِ حق سے یہی حوریں اگر واں ہو گئیں
نیند اُس کی ہے، دماغ اُس کا ہے، راتیں اُس کی ہیں
تیری زلفیں جس کے بازو پر پریشاں ہو گئیں*
میں چمن میں کیا گیا گویا دبستاں کُھل گیا
بلبلیں سُن کر مرے نالے غزل خواں ہو گئیں
وہ نگاہیں کیوں ہُوئی جاتی ہیں یارب دل کے پار؟
جو مری کوتاہئ قسمت سے مژگاں ہو گئیں
بس کہ روکا میں نے اور سینے میں اُبھریں پَے بہ پَے
میری آہیں بخیئہ چاکِ گریباں ہو گئیں
واں گیا بھی میں تو ان کی گالیوں کا کیاجواب؟
یاد تھیں جتنی دعائیں صرفِ درباں ہو گئیں
جاں فزا ہے بادہ جس کے ہاتھ میں جام آ گیا
سب لکیریں ہاتھ کی گویا، رگِ جاں ہو گئیں
ہم موحّد ہیں ہمارا کیش ہے ترکِ رسُوم
ملّتیں جب مٹ گئیں اجزائے ایماں ہو گئیں
رنج سے خُوگر ہُوا انساں تو مٹ جاتا ہے رنج
مشکلیں مجھ پر پڑیں اتنی کہ آساں ہو گئیں
یوں ہی گر روتا رہا غالبؔ تو اے اہل جہاں
دیکھنا ان بستیوں کو تم کہ ویراں ہو گہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
*حالی، یادگارِ غالبؔ میں یوں ہے: جس کے بازو پر تری زلفیں پریشاں ہو گئیں
Sab kahan kuch lala-ogul mein numayan ho gaien
Khak mein, kaya sooratein hongi jo pinhan ho gaien
Yaad thin hum ko bhi runag rung bazma aaraiyan
Laikin ab naqsh-o-nigare taaq nisiyan ho gayein
Thin banat-un-nash gerdon din ko perde mein nihan
Shab ko un ke ji mein kaya aayee ki uriyan ho gaien
Qaid main yaqqoob ne na lee go na usuf ki khber
Laikin aankhien rauzan deware zindan hogaien
Sab raqeebon se hon nakhush, per zanane misr se
Hai zulaikha khush kih mahwe maahe kanaan ho gaien
Joai khon aankhon se bahne do ki haishame firaq
Main yeh sajhonga kih shamien do farzan ho gaien
I parizadon se lemgey khuld mein hum inteqam
Qudarate haq se yahi hoorien, agerwan ho gaien
Neend uski hai, dimagh uska hai ratein uski hain
Teri zulfien jis ke bazoo per parishan ho gaien
Main chaman mein kaya gaya, goya dabistan khul gaya
Bulbhlien sun sun ker mere nale ghzal khaun ho gaien
Woh nigahien kiyon huie jaati hain yaarab! Dil ke par
Jo meri kotahi qismat se masgan ho gaein
Bas kih roka main ne, aur seene mein ubhrien pai bah pai
Wan gaya bhi main, to un galiyon ka kaya jawab!
Yaad thi jitni duaein serfe derban ho gaein
Janfaza hai badah jis ke hath mein jaam aa gaya
Sab lakirien hath ki goya ragien jaan ho gaien
Hum to mohhid hain, hamar kaish hai terke rasoom
Miltien jab mit gaien, ajzaye iman ho gaien
Runj se khoger hua insan to mit jata hai runj
Mushkilein mujh per padien kih asan ho gaien
Yon hi ger rota raha Ghalib, to ai ahle jahan
Daikhna in bastiyon ko tum kih weeran ho gaein
