آبرو کیا خاک اُس گُل کی۔ کہ گلشن میں نہیں

آبرو کیا خاک اُس گُل کی۔ کہ گلشن میں نہیں
ہے گریبان ننگِ پیراہن جو دامن میں نہیں
ضعف سے اے گریہ کچھ باقی مرے تن میں نہیں
رنگ ہو کر اڑ گیا، جو خوں کہ دامن میں نہیں
ہو گئے ہیں جمع اجزائے نگاہِ آفتاب
ذرّے اُس کے گھر کی دیواروں کے روزن میں نہیں
کیا کہوں تاریکئِ زندانِ غم اندھیر ہے
پنبہ نورِ صبح سے کم جس کے روزن میں نہیں
رونقِ ہستی ہے عشقِ خانہ ویراں ساز سے
انجمن بے شمع ہے گر برق خرمن میں نہیں
زخم سِلوانے سے مجھ پر چارہ جوئی کا ہے طعن
غیر سمجھا ہے کہ لذّت زخمِ سوزن میں نہیں
بس کہ ہیں ہم* اک بہارِ ناز کے مارے ہوُے
جلوۂ گُل کے سِوا گرد اپنے مدفن میں نہیں
قطرہ قطرہ اک ہیولیٰ ہے نئے ناسور کا
خُوں بھی ذوقِ درد سے، فارغ مرے تن میں نہیں
لے گئی ساقی کی نخوت قلزم آشامی مری
موجِ مے کی آج رگ، مینا کی گردن میں نہیں
ہو فشارِ ضعف میں کیا نا توانی کی نمود؟
قد کے جھکنے کی بھی گنجائش مرے تن میں نہیں
تھی وطن میں شان کیا غالبؔ کہ ہو غربت میں قدر
بے تکلّف، ہوں وہ مشتِ خس کہ گلخن میں نہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔
* نسخۂ مہر اور آسی میں ” ہم ہیں” درج ہے۔


Aabro kaya khak us gul ki gushan mein nahin
Hai gariban nanuge pairahan, jo daman mein nahin
Zof se ai giryah! Kuch baqi mere tan mein nahin
Rung ho ker udgaya, jo khon ke daman mein nahin
Ho gai hain jama ajzaye nigahe aaftab
Zarre uske gher ki deewaron ke rauzan mein nahin
Raunaqe hasti hai ishq khana weeran saz se
Anjuman be shama hai, ger berqe khirman mein nahin
Zakhm silwane se mujh pe charai jooi ka taan
Gair samjha hai ki lazzat zakhme sozan mein nahin
Baski hum hain eik bahare naaz ke mare huai
Jalwai gul ke sewa, gerd apne madfan mein nahin
Qatrah qatrah eh hiyolahai, nai nasoor ka
Khoon bhi, zauqe derd se farigh mere tan mein nahin
Le gaye saqi ki nakhwat, qulzame ashami meri
Mauj mai ki aaj rag, meena ki gerdan mein nahin
Ho fisher zof mein kaya natawani ki ki namood!
Qad ke jhukne ki bhi gunjaish mere tan mein nahin
Thi waten mein shan kaya, ghalib!kih ho gurbat mein qadar
Be takalluf, hon who mushte khaskih gulkhan mein nahin