ہوئی تاخیر تو کچھ باعثِ تاخیر بھی تھا

ہوئی تاخیر تو کچھ باعثِ تاخیر بھی تھا
آپ آتے تھے، مگر کوئی عناں گیر بھی تھا
تم سے بے جا ہے مجھے اپنی تباہی کا گلہ
اس میں کچھ شائبۂ خوبیِ تقدیر بھی تھا
تو مجھے بھول گیا ہو تو پتا بتلا دوں؟
کبھی فتراک میں تیرے کوئی نخچیر بھی تھا
قید میں ہے ترے وحشی کو وہی زلف کی یاد
ہاں! کچھ اک رنجِ گرانباریِ زنجیر بھی تھا
بجلی اک کوند گئی آنکھوں کے آگے تو کیا!
بات کرتے، کہ میں لب تشنۂ تقریر بھی تھا
یوسف اس کو کہوں اور کچھ نہ کہے، خیر ہوئی
گر بگڑ بیٹھے تو میں لائقِ تعزیر بھی تھا
دیکھ کر غیر کو ہو کیوں نہ کلیجا ٹھنڈا
نالہ کرتا تھا، ولے طالبِ تاثیر بھی تھا
پیشے میں عیب نہیں، رکھیے نہ فرہاد کو نام
ہم ہی آشفتہ سروں میں وہ جواں میر بھی تھا
ہم تھے مرنے کو کھڑے، پاس نہ آیا، نہ سہی
آخر اُس شوخ کے ترکش میں کوئی تیر بھی تھا
پکڑے جاتے ہیں فرشتوں کے لکھے پر ناحق
آدمی کوئی ہمارا َدمِ تحریر بھی تھا؟
ریختے کے تمہیں استاد نہیں ہو غالبؔ
کہتے ہیں اگلے زمانے میں کوئی میر بھی تھا


Huie takheer to kuch baise takheer bhi tha!
Aap ate the magar koi ana geer bhi tha!
Tum se baija hai mujhe apni tabahi ka gila
Us mein kuch shaibakhoobiye taqdeer bhi tha
To mujhe bhool gaya ho to pata batla doon
Kabhi fitrak mein tere koi nkhcheer bhi tha?
Qaid mein hai tere wahshi ko tere zulf ki yad
Han kuch ek runj giran bariye zanjee bhi tha
Bijli ek kond gaye ankhon ke agey to kaya!
Bat kerte, ki mein lub tashnai taqreer bhi tha
Usuf usko kahon, aur kuch na kahe khair huyee
Gar bigad baithey to main laiqe tazeer bhi tha
Daikh kar gair ko kiyon ho na kalaja thanda
Nalah karta tha wale, talibe taseer bhi tha
Paishe mein aib nhin, na ferhad ko nam
Hum hi aashaftah saron mein woh jawan meer bhi tha
Hum the marne ko khade pas nah aya na sahi
Akhir us shokh ke terkash mein koi teer bhi tha!
Pakde jate hai farishton ke likhe per nahaq
Admi koi hmara dame tahreer bhi tha
Raikhte ke tum ustad nahin ho Ghalib!
Kahte hain agle zamane mein koi meer bhi tha