گلہ ہے شوق کو دل میں بھی تنگئ جا کا

گلہ ہے شوق کو دل میں بھی تنگئ جا کا
گہر میں محو ہوا اضطراب دریا کا
یہ جانتا ہوں کہ تو اور پاسخِ مکتوب!
مگر ستم زدہ ہوں ذوقِ خامہ فرسا کا
حنائے پائے خزاں ہے بہار اگر ہے یہی
دوامِ کلفتِ خاطر ہے عیش دنیا کا
غمِ فراق میں تکلیفِ سیرِ باغ نہ دو
مجھے دماغ نہیں خندہ* ہائے بے جا کا
ہنوز محرمئ حسن کو ترستا ہوں
کرے ہے ہر بُنِ مو کام چشمِ بینا کا
دل اس کو، پہلے ہی ناز و ادا سے، دے بیٹھے
ہمیں دماغ کہاں حسن کے تقاضا کا
نہ کہہ کہ گریہ بہ مقدارِ حسرتِ دل ہے
مری نگاہ میں ہے جمع و خرچ دریا کا
فلک کو دیکھ کے کرتا ہوں اُس کو یاد اسدؔ
جفا میں اس کی ہے انداز کارفرما کا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ ۔۔۔
*نسخۂ نظامی کی املا ہے ’خند ہاۓ‘


Gila hai, shauq ko, dil mein bhi tangie ja ka
Guher mein maho hua iztarab dariya ka
Ye janta hon ki to aur pasuhkhe maktoob!
Magar sitamzadah zauq khamah farsa ka
Hena pai khizan hai, bahar agar hai yhi
Dwame kulfate khatir hai, aish duniya ka
Game firaq mein, takleef saire bag na do
Mujhe dimag nahi khanda haie bai ja ka
Hunooz mahramie husn ko tarasta hon
Kare hai her bune mo, kam chashme bena ka
Dil us ko pahle hi naaz-o-ada se dai baithe
Hamein dimag kahan husn ke taqaza ka!
Na kaih ki girya ba miqdare hasrate dil hai
Meri nigah mein hai jama wo khraj dariya ka
Falak ko daikh ke karta hon us ko yad Asad!
Jafa mein uski hai andaze kar ferfa ka