ab ke Khafa hua hai to itna Khafaa bhii ho

ab ke Khafa hua hai to itna Khafaa bhii ho
tuu bhii ho aur tujh meN ko_ii duusra bhii ho

yuuN to har ek beej kii fitrat daraKht hai
khilte haiN jismeN phuul vo aab-o-hava bhii ho

aankheN na chhiin merii, naqaabeN badalta chal
yuuN ho ki tuu qareeb bhii ho aur judaa bhii ho

rishtoN ke regzaar meN har sar pe dhuup hai
har paaNv meN safar hai, magar raasta bhii ho

duniya ke kahne-sun'ne pe insaaniyat na chhoRh
insaan hai to saath meN ko_ii Khtaa bhii ho

Nida Fazli