سو ڈالر کا نوٹ
--------------------
ایک شخص سڑک کے کنارے اپنے دھیان جا رہا تھا کہ اچانک اُسے وہاں سو ڈالر کا ایک نوٹ پڑا ہوا نظر آیا۔ لیکن مسئلہ یہ تھا کہ نوٹ کا آدھا حصہ وہاں کھڑی ایک کار کے پہیے کے نیچے تھا۔ اُس شخص نے بہت کوشش کی کہ کسی طرح وہ کار کو اُٹھا کر نوٹ کو نکال پائے، لیکن وہ کامیاب نہ ہوا۔ آخر اُسے سڑک کی دوسری جانب ایک "کافی شاپ" نظر آئی۔ اُس نے سوچا، "کیوں نہ میں وہاں جا کر کافی پینے کے بہانے انتظار کرتا ہوں، تب تک ہو سکتا ہے اِس کار کا ڈرائیور اپنی کار کو لے... جائے تو اِس طرح میں سو ڈالر کا نوٹ حاصل کر سکتا ہوں۔۔۔!"
یہی سوچ کر وہ کافی شاپ میں داخل ہوا، لیکن وہ تو کھچا کھچ بھری ہوئی تھی۔ خیر اُس نے ویٹر کو ایک کافی کا آرڈر دیا اور خود ایسی جگہ بیٹھ گیا جہاں سے وہ کار بالکل واضح نظر آئے۔ اتنے میں ویٹر کافی لے آیا۔ وہ شخص سب سے نظر بچا کر بڑے راز دارانہ انداز میں باہر کار کو دیکھتے ہوئے آہستہ آہستہ کافی کے گھونٹ پینے لگا۔ اُس کی کوشش تھی کہ کافی جلدی ختم نہ ہو تاکہ اُسے زیادہ سے زیادہ دیر بیٹھنے کا موقع مل سکے، اور تب تک ممکن ہے کار کا ڈرائیور بھی آ جائے۔
وہ سو ڈالر کے خیالوں میں گم تھا کہ اچانک اُسے ایسا لگا جیسے کافی شاپ میں کوئی زلزلہ آ گیا ہو، ہر شخص باہر کی طرف بھاگنے لگا۔ قبل اِس کے کہ یہ کچھ سمجھ پاتا کافی شاپ خالی ہو چکی تھی، کیوں بھلا۔۔۔۔؟؟؟؟؟؟؟؟
کیونکہ اُس کار کا ڈرائیور آ چکا تھا، اور کافی شاپ میں بیٹھا ہر شخص سو ڈالر کے نوٹ کی خاطر اُسی ڈرائیور کا ہی انتظار کر رہا تھا۔۔۔!!!
۔۔۔۔۔
