چار سُو بازار،تاشقند

http://dunya.com.pk/news/special_fea...wYrOcltzMs.jpg

فقیراللہ خاں
چار سو ُبازار نہ صرف ازبکستان بلکہ پورے سنٹرل ایشیا میں ایک قدیم اور سب سے بڑا بازار ہے۔یہ بازار تاشقند شہر کی مرکزی شارع البیرونی کے کنارے تاریخی مدرسہ ککلداش اور مشہور خوبصورت ہوٹل چار سو کے قریب واقع ہے۔یہ بازار ایک صدی سے بھی زیادہ پرانا ہے۔اس مستقف بازار کے گنبد کا قطر 1148 فٹ ہے جو درمیان میں بغیر کسی ستون کے کھڑا ہے۔اتنے بڑے قطر کا گنبد سارے وسطی ایشیا میں اور کہیں نظر نہیں آتا۔چار سُو بازار کے گنبد کے اوپر ہلکے فیروزی رنگ کی چھوٹی چھوٹی ٹائیلوں سے خوبصورت بیل بوٹے بنائے گئے ہیں۔اس خوبصورت گلکاری کو دیکھ کر انجینئروں اور کاریگروں کی اعلیٰ مہارت کا فن عروج پر نظر آتا ہے۔یہ بازار تین منزلہ ہے جبکہ ایک تہہ خانہ بھی موجود ہے۔پہلی منزل کے سارے فلور پر دائروں کی شکل میں کاؤنٹر بنائے گئے ہیںجو کہ ماربل کے پتھر سے تیار کیے گئے ہیں۔ اس منزل میں تازہ سبزیاں، فروٹ، گوشت، دودھ ،دہی،پنیر اور ان سے بنی ہوئی دوسری اشیا دستیاب ہیں۔گرم گرم تازہ نان، شہد اور گرم مصالحے بھی اسی فلور پر فروخت ہوتے ہیں۔اوپر کی منزل پر ہرطرح کا ڈرائی فروٹ جن میں کشمش،خشک خوبانی، بادام، اخروٹ، پستہ ڈھیروں کی شکل میں گاہکوں کی توجہ کا مرکز بنے رہتے ہیں۔ چار سُو بازار شہر کے وسطی حصہ میں واقع ہے۔یہاں پر ٹرالی بس،ٹرام،میٹرو اور ٹیکسی کے ذریعے آسانی سے پہنچا جاسکتا ہے لیکن ان میں تاشقند میٹرو باکفایت،آرام دہ اور کم وقت لینے والا بہترین ذریعہ ہے۔شہر کے کسی بھی حصہ میں آپ میٹرو میں سوار ہوجائیں دس پندرہ منٹ بعد آپ چار سُو میٹرو سٹیشن پر ہوں گے جوکہ زیر زمین ہی واقع ہے۔جب آپ میٹرو سٹیشن سے باہر آئیں گے تو چارسُو بازار آپ کے سامنے ہوگا۔بڑے میدان کے ایک طرف ازبک بازیگر اپنے شاندار کرتبوں سے حاضرین کو محظوظ کر رہے ہوں گے۔اس بازار کے اندر اور باہر کم وبیش ایک ہزار دکانیں موجود ہیں۔ فرنیچر، لباس، قالین،بچوں کے جُھولے،دلہا دلہن کے عروسی لباس بھی دستیاب ہیں۔سوونیئر سے دلچسپی رکھنے والوں کے لیے چار سُو بازار بہترین جگہ ہے۔چائے خانے بھی موجود ہیں۔غرضیکہ چار سُو بازار اس علاقے کے آئینہ کی طرح ہے جہاں ایک ہی جگہ آپ کو شہر کی ثقافت بھرپور انداز میں نظر آتی ہے۔اگر آپ کسی مشرقی بازار کو حقیقی رنگ میں دیکھنا چاہتے ہوں تو چار سُوبازار آپ کا صحیح انتخاب ہے۔ (سیر جہاں سے مقتبس) ٭…٭…٭