Phir Is Hi Manzil Se Kafi Sobar Aur Parha Likha Insane Nazar Aaya.Zara Gour Kia Toh Maloom Hua Ke Ye Wo Khoobroo Nojawan Hain Jin Ki Pehchan Is Khan Manzil Ke Hawale Se Sab Se Ziada Hai.Is Baat Ka Andaza Mujhe Unke Hulliye Ko Daikh Kar Hua Ke Ye Khan Sb Hain.Sahab Ki Pent Pe Kreez Itni Mazboot Thi Ke Shayad Das Baar Dho Bhi Dalain Toh Ye Banayee Gai Bunyaadi Creez Safh-E-Hasti Se Mitt Na Sake.Sir Se Paaon Talak Inki Maahirana Salahiyatain Tapak Rahi Theen..Khan Sb Kaha Jata Tha Inko.Sunn Ne Main Aaya Tha Ke Khan Manzil Ke Baasiyoun Main Jo Fouj Payee Jati Hai Un Main In Khan Sb Ka Hissa Sab Se Ziada Hai.Khan Sb Ne Teen Shadiyaan Kar Rakhi Hain Aur Har Bv Se Das Nahi Toh 6 Ya 7 Ya Shayad Na Maloom Miqdaar Ke Fouji Toh Khan Sb Ki Creation Zaroor Honge..In Ke Hulliye Se Hi Lagta Tha Ke Jo Inko Daikhti Hogi Fida Hoti Hogi.
Abhi Khan Sb Apne Kisi Mulaqaati Se Mill Hi Rahe The Ke Khan Manzil Main Aik Aur Baasi Dakhil Hua.Umr Uski Koi Das Baras Hogi ,Magar Bare Shoq Se Khan Sb Ka Aik Halke Hath Ka Thapar Apne Sir Pe Kha Ke Wo Manzil Ke Andar Rawana Hua.Jis Se Mujhe Ye Samajne Main Asaani Hui Ke Ye Inhi Ki Creation Hai.Tabhi Itne Pyar Se Thappar Kha Ke Tapa Nahi. Chaar Adad Larkiyan Umr Unki Bhi Lag Bhag Aath Se Baara Baras Ke Darmayaan Hogi Wo Khan Manzil Se Baraamad Hui..Meri Hansi Nikal Gai.Ke Lo Ji Chaar Adad Aur Namoone Hazir Ho Gaye. Ye Bhi Kahin Khan Sb Ki Meherbani Nahi Houn.Magar Unke Khailne Se Aur Aik Doosre Ko Pukaarne Se Andaza Hua Ke Ye Namoone Mukhtalif Lougon Ke Hain.Koi Apne Papa Ka Koi Apni Mama Ka Koi Apni Nani Ka Zikar Karte Aik Doosre Se Muqabla Kar Rahi Hain.Mere Zehen Main Aaya Ke Bachiyoun Ka Ye Hal Hai Toh Khan Manzil Ki Khawateen Toh Pata Nahi Kitna Muqaabla Kia Karti Hongi..Jin Main Kabhi Muqaabla-E-Hussn Toh Kabhi Muqaabla-E-Pehnawa Aur Kabhi Muqaabla-E-Shohar Hi Hua Karta Hoga.
Khair Abhi Ye Khail Khatam Nahi Hua.Khan Manzil Ke Samne Aik Khatara Fox Model Paaye Jati Thi.Aaj Nazar Nahi Ayee..Magar Phir Door Hi Se Is Ki Ghangharahat Mere Kaanoun Ko Choone Lagi.Main Samajh Gai Ke Laado Paredesan Aa Gai Hai.Saare Mohalle Ne Khan Manzil Ki Is Wahid Chalti Phirti Gaari Ka Naam Laado Pardesan Rakha Hua Tha.Jo Pata Nahi Is Manzil Ke Kitne Baasiyon Ko Din Bhar Kaha Se Kahan Tak Dhoya Karti Thi.Ain Hamare Darwaaze Ke Samne Aa Kar Ruk Gai.Jis Ki Agli Seat Se Pehle Toh Aik Khatoon Aik Hath Main Do Saal Ka Maasoom Bacha Liye Aur Aik Hath Main Dhair Sari Sabziyan Liye Utri .Jin Main Tamatar ,Pyaz, Palak, Matar , Gobhi Aur Pata Nahi Kia Kia Agram Bagram The .Wo Seedhi Khan Manzil Ke Andar Dakhil Hui.Aur Phir Is Hi Seat Ko Aage Kar Ke Is Main Se Pehle Aik Bacha.Phir Doosra Bacha.Phir Teesra..Chotha.Paanchwa Main Ne Ginne Toh Poore 7 Bache Baraamad Hue.Aur Sab Se Aakhir Main Aik Naazuk Si Koi 40 Baras Ki Khatoon Ye Alfaz Kehte Hue Aye Hat Pare Ho..Kia Manhoos Sare Raaste Mere Oopar Sawar Rahe Aur Abhi Bhi Chipke Pare Hain.Hat Zara Saans Toh Lene De..Aur Seedhe Khan Manzil Ke Andar Chali Gai.
Un Bachoun Main Se Kuch Bache Un Larkiyoun Ke Sath Khelne Main Lag Gaye.Gaaliban Itwaar Bazaar Se Is Manzil Ki Pait Pooja Ke Liye Dhair Sari Sabziyoun Ka Bandobast Karne Ke Liye , Bazahir Taqatwar Nazar Aane Wali Magar Maasoom Foxy Pe Itne Dhair Sare Loug Laad Ke Le Jaaye Gaye The. Daad Dena Chahiye Is Gaari Ki Bhi.Agar Is Ki Jaga Koi Aam Gari Hoti Toh Housla Haar Gai Hoti.Magar Khan Manzil Hai Koi Aam Baat Thori Hai
.
Koi Khan Manzil Ke Andar Ja Raha Tha Toh Koi Khan Manzil Se Bahar Aa Rahe The.Aik Halchal Barpa Thi.Mujh Se Raha Nahi Gaya.Khan Sb Ki Aik Mrs Mujhe Aksar Mila Karti Thi Walk Pe.Pata Nahi Kaise Itne Bachoun Ki Zimmedari Hote Hue Bhi Unke Jisam Ki Charbi Din Ba Din Barhti Ja Rahi Thi.Unki Jaga Koi Aur Hoti Toh Shayad Sookh Ke Kaanta Ho Gai Hoti.Khair Mujhe Aksar Apne Ghar Aane Ki Daawat Dia Karti Thi.Main Ne Socha Aaj Is Khan Manzil Ka Chakkar Laga Hi Aoon.Aur Is Main Mojood Baasiyoun Ko Gin Loon Kion Ke Shayad Hi Koi Kamyaab Hua Ho Fouj Ki Ginti Main.Main Ne Socha Main Toh Zaroor Kamyab Ho Jaoongi. Waise Bhi Mera Dil Is Ghar Ki Halchal Ko Mehsoos Karne Ke Liye Betaab Tha.Magar Is Khan Manzil Ke Obaash Brothraan Se Bhi Koun Waqif Nahi Tha. Phir Bhi Mujh Se Raha Nahi Gaya.Aur Main Ne Ammi Ko Bata Ke Khan Manzil Ka Rukh Kia.
Mujhe Laga Tha Ke Darwaze Main Dakhil Hote Sath Hi Andar Koi Khula Sehen Hoga.Magar Khan Manzil Ka Ye Darwaza Oopar Wale Portion Ki Taraf Bilkul Patli Si Seerhiyoun Se Jata Tha.Main Ne Himmat Ki Aur Seerhiyan Charhne Lagi..Pehli Seerhi Se Aakhri Seerhi Tak Ka Safar Bamushkil Tamaam Teen Char Bachoun Ke Neeche Utarne Ki Waja Se Main Ne Mukkamal Kia.Aur Dopeher Ke 12 Hone Ke Bawajood Buri Si Shakal Banaye Moonh Main Brush Apne Daant Saaf Karte Aik Obaash Se Main Ne Sadia Aunty Ka Poocha.Us Ne School Ki Imaarat Ki Tarha Bani Is Khan Manzil Ke Paanchwe Kamre Ki Taraf Ishara Kia.Main Thori Uljhi Aur Phir Apni Nazar Se Gin Kar Paanchwe Kamre Ke Aadh Khule Darwaze Ko Knock Kia. Aik Adad Joota Mera Paaon Ke Kareeb Aa Kar Gira.Jis Se Mujhe Andaza Hua Ke Kamre Main Jung Chiri Hui Hai.Jis Ka Khamyaaza Agar Zara Pal Bhar Ki Jald Bazi Hoti Toh Main Ne Bhugta Hota..Shukar Hai Baal Baal Bachi.Obaash Ki Nazrain Toh Mujh Par Se Hati Hi Nahi Thi Sath Main Moonh Se Tapakte Paste Ke Sath Us Ne Khe Khe Bhi Karna Shroo Kar Di.Mera Khoon Khol Utha.Par Is Waqt Khoon Ki Kholahat Se Ziada Dil Ki Bechaini Ehem Thi.
Main Kamre Main Daakhil Hui.Aunty Ke Hath Main Us Hi Joote Ka Doosara Pair Tha Jo Darwaze Se Bahar Baraamad Hua.Mujhe Daikh Kar Zara Sambhli Aur Boli..Le Pehen Ye Jota Aur Dafa Ho Kamre Se.Lar Lar Kar Mera Naak Main Dam Kar Dia Hai.Phir Mujhe Khan Sb Yaad Aye.Bane Sanwre Khan Manzil Ke Samne Khare The Aur Andar Ye Bachoun Ki Fouj Baap Ko Chor Maa Ko Pareshan Kar Rahi Thi.Mere Moonh Se Yaklakht Nikla..Wah Khan Manzil..
Aunty Kaise Manage Karte Hain Ap Loug.Mashaallah Itne Loug Aur Utna Hi Kaam Kaaj. Beta Manage Karma Kia Mushkil Hai.Jitni Fouj Barhti Jati Hai Utne Bhai Jan Bajiyaan Banti Jati Hain.Aur Har Bhai Jan Baji Apne Mufeed Mashwaron Se Choti Behen Ya Chote Bhai Ko Nawazte Rehte Hain.Abhi Daikha Nahi Tum Ne.Ye Joota Chalyee Ho Rahi Thi.Ye Isliye Hi Ho Rahi Thi Ke Bhai Jaan Ko Acha Nahi Laga Ke Chote Bhai Aram Farma Rahe Hain Bara Baje Tak.Main Hansi Aur Dil Main Socha Ke Haan Faaide Bhi Hain Inti Bari Family Ka Aur Nuksanaat Bhi.Jaie Us Obaash Ki Maan Ko Hosh Nahi Hoga Ke Unka Aik Adad Beta Obaashi Ke Sare Darje Cross Kar Chukka Hai Aur Ab Bas Par Lagne Ki Dair Hai Khan Manzil Se Phurr Se Urr Jaye Ga.Waise Hi
Khan Sb Ko Andaza Nahi Ke Unki Beewaiyaan Kis Uljhan Ka Shikar Hain.
Baithe Baithe Main Ne Nazar Daali..Jis Portion Main Main Baithi Thi Is Main Koi 8 Kamre Toh Honge Hi.Aur Har Kamre Se Koi Na Koi Cheekh-O-Pukaar Sunayee De Rahi Thi.Kahin Glass Toota .Kahin Ammiiiiiiiiiiiiiii Bhai Maar Raha Hai Ki Awaz Aye.Aur Kahin Toh Hato Pare Dafa Ho Ke Naare Buland Ho Rahe The.Aik Hulchal Machi Hui Thi . Garz Khan Manzil Aik Makaan Hone Ki Bajaye Insanoun Ki Mandi Ka Nazara Paish Kar Rahi Thi.Mujhe Samajh Ayee Ke Ye Manzil Itni Mashoor Kion Hai.Aur Din Ba Din Is Ke Charche Barhte Kion Ja Rahe Hain..Dar Asal Din Ba Din Is Manzil Ki Fouj Barhti Ja Rahi Hai.Hamare Mohalle Ki Koi Bakry Koi Sabzi Wala.Koi Doodh Dahi Farosh..Koi Pakore Samose Wala Aur Koi School Inke Ataab Se Mehfooz Nahi..Meri Toh Hansi Nikal Gai.Aunty Ne Poocha Kion Hans Rahi Ho Beta..Main Ne Kaha Kuch Nahi Aunty Bachoun Ki Shararat Pe.Main Ne Kaha Aunty Zara Neeche Daikhoon.Neeche Wali Manzil Se Bari Awaazain Aa Rahi Hain.Kehne Lagi Han Han Kion Nahi Beta..Aur Mere Sath Hi Apne Wazan Ko Sambhaalte Hue Deewar Pe Aadhi Latak Gai.Aur Lagi Lubna Ko Mukhatib Karne.Lubna Ye Sath Waloun Ki Bachi Aayee Hai Tumko Salam Karne.Main Ne Salam Kia Aur Sath Hi Apni Betaab Nazar Neechli Manzil Pe Daali.Hoo Ba Hoo Oopar Wali Manzil Chaaroun Taraf Kamre The.Kuch Adh Khule Darwaze Kuch Pe Parde Latakte Hue.Lubna Aunty Chaarpayee Pe Baithi Bechari Us Palak Ko Zibbah Kar Rahi Thi Jo Abhi Itwaar Bazaar Se Is Khan Manzil Main Qurbaani Paish Karne Laaye Gai Thi.Pata Nahi Bechari Kitni Dair Tak Palak Aur Is Aaloo Ko Zibbah Karaingi Toh Khan Manzil Ke Kisi Aik Hisse Ki Pait Pooja Hogi. Samne Wali Kursi Pe Doosri Aunty Apni Beti Ko Farsh Pe Bitha Ke Uski Jooain Nikaal Rahi Theen Aur Sath Sath Irrd Gird Khailte Do Teen Bachoun Ko Salawatain Bhi Suna Rahi Thi.Kambakhto Koi Waqt Toh Chup Ho Jaya Karo.Har Waqt Naak Main Dam Kar Ke Rakhte Ho..Baapoun Ko Toh Hosh Nahi Ke Inko Sambhal Lain.Lambe Pare Bistar Pe Lot Pot Hote Rehte Hain Sara Itwar Is Hi Chakh Chakh Main Guzar Jata Hai.Haye Re Khan Manzil Tu Aur Teri Pod(Nasal).Main Abhi Ye Sab Daikh Hi Rahi Thi Ke Ooopar Wali Manzil Se Aisi Cheekh Uthi Ke Jaise Abhi Kisi Ne Jaan De Di Ho.Par Aisi Cheekhain Yahan Ka Khaasa Theen. Jab Khan Sb Ki Do Adad Biwiyaan Aik Doosre Se Jelousy Ki Taab Na La Sakti Theen Toh Gutham Gutha Ho Jaya Karti Thi.Aur Phir Unke Bachoaw Ke Liye In Dono Hi Ke Bache Apas Main Ulajh Jaya Karte The.Bechare Khan Sb Ki Ikloti Jaan Aur Unki Ikloti Jaan Ko Itne Sare Wabaal.Na Hota Inka Dil Itna Mom Na Hi Itne Pathar In Ke Sir Pe Baraste.Bechare Kia Karte.Bhaage Bhaage Oopar Wali Manzil Pe Charhe.Aur Unki Daikhne Wali Shakhsiyat Yakdam Galam Galoch Ka Nazara Paish Karne Lagi.Mujhe Laga Ke Izzat Issi Main Hai Ke Khan Manzil Ko Kaha Jaye Khair Baad. Acha Aunty Ab Main Chalti Hon.Kehne Lagi Chaye Toh Pee Jaow..Main Ne Kaha Nahi Mujhe Yaad Aaya Market Jana Hai Hamain.Phir Aaoongi Unhoun Ne Bhi Aafiyat Jani Mere Chale Hi Jane Ko.
Seerhiyoun Se Utar Rahi Thi Ke Doosre Do Adad Obaashoun Ki Jhalak Bhi Daikhne Ko Mill Gai.Socha Raasta Dainge Mujhe Par Unko Toh Laga Ke Aaj Seerhiyoun Main Hi Taakra Ho Jaye.Marti Kia Na Karti Wapas Khan Manzil Main Charh Gai. Salam Arz Hai Janab.Ye Jumla Aik Obash Ne Kasa.Main Chup Rahi Aur Neeche Utar Gai Neeche Utarte Sath Hi Aik Dam Aisa Laga Jaise Kisi Khamosh Manzar Main Daakhil Ho Gai Hoon.Chaaroun Taraf Sannata Cha Gaya. Aur Halki Phulki Chehchahti Chiryoun Ki Awaaz Kaanoun Main Parne Lagi Aisa Laga Ke Jaise Koi Toofaan Tham Gaya Ho. Aakhir Kaar Main Samajh Payee Ke Ye Khan Manzil Itni Mashhoor Hai Kion.
Ye Nazara Toh Meri Aankhoun Daikha Tha.Par Khan Manzil Main Aise Aur Bhi Kafi Nazare Hote Honge Jo Abhi Ke Aadhe Ghante Main Meri Nazar Se Nahi Guzre..Kion Ke Bare Khan Sb Ke Aur Bhi Bete The Aur Un Aur Bhi Betoun Ki Aur Bhi Aulaadain Theen..Main Ne Socha Chalo Jee Dopeher Ko Apne Pur Sakoon Kamre Ka Khamoshi Toh Naseeb Hogi.Magar Phir Khayal Aaya.Ke Khan Manzil Main Zindagi Aik Aik Kone Main Paaye Jati Hai.Aur In Logon Ki Bhi Daad Deni Chahiye Jo Itne Masaail Ke Bawajood Aik Doosre Se Kabhi Lar Kar Toh Kabhi Kaise Guzara Kar Rahe Hain..
Bahar Nikal Kar Main Ne Wapas Murr Kar Khan Manzil Ki Deewar Pe Gehra Khuda Hua Khan Manzil Par Dhayan Dia Aur Phir Is Manzil Ke Baasiyoun Par Aur Un Ki Door Se Hi Aati Aawaazoun Pe. Mashoori Ki Waja Khud Ba Khud Mere Zehen Main Paiwast Ho Gai.Aur Hanste Hue Main Ne Apne Ghar Ka Rukh Kia.
NOTE: Topic Manzil Aik Bohot Hi Hassas Topic Hai.Aur Is Pe Likhne Likhaane Ko Bohot Kuch Hai.Aur Yakeenan Yahan Mere Sath Sath Aur Bhi Loug Hain Jinhoun Ne Bohot Umda Likha Hai Aur Likhainge..Main Ne Socha Is Topic Ko Aik Mazah Ka Andaaz Dia Jaye.Isliye Aap Logon Ko Thora Hansaane Ko Main Ne Is Ko Is Tarha Tarteeb Dia Ke Aap Lougon Ki Dilchasp Is Tehreer Se Kam Bhi Nahi Ho Aur Ap Lougon Ke Bor Hone Se Pehle Ye Khatam Bhi Ho Jaye..Dua Kijiye Ga Ke Aur Manziloun Main Is Ki Manzil Kaafi Aage Ho..Aameen.
