آنکھوں کی رنگت

**Rana Taimoor Ali** · 06-07-2015, 05:24 PM

سویڈین کی اوریبرو یونیورسٹی میں 428 افراد سے کئے گئے سروے میں یہ بات سامنے آئی ہے کہ آنکھوں کی رنگت اور شخصیت کے درمیان گہرا تعلق ہوسکتا ہے جب کہ ایڈنبرا یونیورسٹی کے ڈاکٹر اینٹونی فیلون کے مطابق آنکھوں میں دماغی افعال کے بارے میں بہت اہم معلومات ہوتی ہیں کیونکہ دماغ کا یہ واحد حصہ ہے جو باہر کی دنیا دیکھ سکتا ہے۔ ان کے مطابق آنکھوں کی رنگت اور شخصیت کے درمیان یہ گہرا تعلق ہوتا ہے۔

کتھئی اور سیاہ آنکھیں

ایسے لوگ قدرتی رہنما ہوتے ہیں جب کہ ذیادہ گہرے رنگت کی آنکھوں والے افراد بات کو سمجھ کر رضامندی اختیار کرتے ہیں۔ ایسے افراد کو چاہیے کہ وہ اپنے اندر کی قوت استعمال کریں تاکہ دنیا کو اپنی اہمیت بتاسکیں۔ خصوصاً پاکستان میں آبادی کی اکثریت کی آنکھیں اسی رنگ کی ہیں۔

نیلی آنکھیں

دنیا کی 16 فیصد آبادی نیلی آنکھوں کی حامل ہے جو جسمانی مضبوطی کو ٖظاہر کرتی ہے۔ نیلی آنکھوں والی خواتین دیگر خواتین کے مقابلے میں زچگی کی تکلیف قدرے ہمت سے برداشت کرتی ہیں۔ ان میں ذہنی تناؤ اور ڈپریشن کو جھیلنے کی زبردست صلاحیت ہوتی ہے۔ پیشہ ورانہ زندگی میں ایسی خواتین متحرک ، ذہین اور اعلیٰ اوصاف کی مالک ہوتی ہیں۔

سرمئی آنکھیں

سرمئی یا گرے آنکھیں اگرچہ بہت نایاب ہیں اور یہ نیلی آنکھوں کا ایک شیڈ ہی ہے۔ ایسی آنکھوں والے مرد و خواتین بہت حد تک متوازن شخصیت کے مالک ہوتے ہیں لیکن کبھی کبھی انہیں اپنے معاملات برتنے میں بہت مشکل ہوتی ہے۔ ایسے لوگوں کا رویہ دفاعی ہوسکتا ہے اور وہ اپنے ماتحتوں سے سخت محنت کرواتے ہیں۔

سبز مائل براؤن آنکھیں

ایسی آنکھیں بھی نایاب ہیں جن میں آنکھوں کی بیرونی جانب کی رنگت سبز ہوتی ہے اور پتلی کی جانب کی رنگت ہلکی براؤن ہوتی ہیں۔ ایسے لوگ آزاد، خودمختار اور خود اعتماد ہوتے ہیں۔ ان کی شخصیت کے بارے میں پیش گوئی کرنا بہت مشکل ہوتا ہے اور شخصیت کچھ پیچیدہ ہوتی ہے۔ ایسے لوگوں کے ساتھ کام کرنا بھی ایک چیلنج ہوتا ہے۔

سبز آنکھیں

سبز آنکھوں والے پراسرار اور جنسی کشش رکھتے ہیں۔ ایسے لوگوں کی پیش گوئی نہیں کی جاسکتی لیکن انہیں فوری طور پر غصہ نہیں آتا ۔ ایسے لوگ دباؤ اور چیلنج میں بہت اچھی کارکردگی دکھاتےہیں اور تخلیقی صلاحیتوں کے حامل ہوتے ہیں۔