بنگلہ دیش کا اعلانِ آزادی

**intelligent086** · 12-12-2014, 08:33 AM

نگلہ دیش کی آزادی کا اعلان کرنے والا پہلا شخص میجر ضیاء الرحمٰن تھاجو بعد میں بنگلہ دیش آرمی کا چیف آف آرمی سٹاف ،مارشل لاء ایڈمنسٹریٹراورصدر بنگلہ دیش بنااوربعد میں انکی مسز خالدہ ضیاء بھی وزیر اعظم بنیں۔ میجر ضیاء الرحمٰن سے میری واقفیت پاکستان ملٹری اکیڈیمی میں1967ء میں ہوئی جب اسکی پوسٹنگ وہاں ہوئی اُس دورمیں اکیڈیمی میںآفیسرز کی تعداد بہت کم ہوتی تھی اس لئے سب ایک دوسرے سے گھل مل کر ایک خاندان کی طرح رہتے تھے۔زیادہ تر آفیسرز شادی شدہ تھے جو اپنی فیملیز کے ساتھ علیحدہ علیحدہ رہائش پذیرتھے۔میجرضیاء الرحمٰن بھی شادی شدہ تھااورفیملی کیساتھ رہتاتھا۔ہماری طرح غیرشادی شدہ آفیسرز محض چند ایک ہی تھے جو آفیسرز میس میں رہتے تھے۔کم آفیسرزہونے کی وجہ سے ایک دوسرے کے گھر آناجاناایک معمول تھا۔رمضان المبارک میں تقریباًروزانہ کسی نہ کسی شادی شدہ آفیسرکے گھر افطاری ہوتی اورسب وہاں اکٹھے ہوتے ۔خوب گپ شپ لگتی اتوارکے دن آفیسرز کیلئے سپیشل سینما شوہوتاتووہاں بھی تمام آفیسرز اورفیملیز کی ملاقات ہو جاتی۔اُس دورکے بہت سے جو نیئر آفیسرزبعد میں اعلیٰ مقام تک پہنچے اورکچھ تاریخ ساز شخصیتیں ثابت ہوئے۔اُن میں ایک میجر ضیاء الرحمن بھی تھا۔یہ تقریباً دوسال وہاں رہالیکن بہت سنجیدہ بلکہ وہ مغرورقسم کا انسان تھا۔ہم جیسے جونیئر آفیسرزسے بات کرنامناسب نہیں سمجھتاتھا۔میں نے شاید ہی کبھی اسے کھل کرہنستے ہوئے یاگپ لگاتے ہوئے دیکھاہولیکن باقی بنگالی آفیسرزکی بات دوسری تھی۔انکی مسز جواس وقت محض بھابھی خالدہ تھیں زیادہ ہنس مکھ اورباوقارخاتون تھیں۔ اب جب کبھی میں میجر ضیاء الرحمن کے اس دور کے رویے پر غور کرتا ہوں تو مجھے احساس ہوتا ہے کہ شاید اس وقت بھی یہ مغربی پاکستانیوں کو پسند نہیں کرتا تھا۔
میجرضیاء الرحمن پاکستان ملٹری اکیڈیمی کا تربیت یافتہ آفیسرتھااورپیشہ ورانہ طورپر دلیر اورقابل آفیسرز میں شمارہوتاتھا۔اگرمتحدہ پاکستان رہتا تو یقینایہ فوج کے اعلیٰ مقام تک پہنچتا ۔اس کا تعلق 8ایسٹ بنگال رجمنٹ سے تھا جو مارچ 1971ء میں جب فوجی کارروائی کا حکم ملا تو چٹاگانگ میں مقیم تھی ۔میجر ضیاء الرحمن یونٹ کا سیکنڈ اِ ن کمانڈ تھا۔مغربی پاکستان کے لیفٹیننٹ کرنل عبدالرشید جنجوعہ (شہید) یونٹ کے کمانڈنگ آفیسر تھے۔چٹاگانگ میں چونکہ ایسٹ بنگال رجمنٹل سنٹر بھی تھا اس لئے پورے مشرقی پاکستان میں سب سے زیادہ بنگالی فوجیوں کی تعداد بھی چٹاگانگ میں ہی تھی۔بدقسمتی سے سب سے زیادہ سویلین مغربی پاکستانیوں اوربہاریوں کی تعداد بھی چٹاگانگ ہی میں تھی جو وہاں مختلف سروسز، کاروباریا مزدوری وغیرہ کرتے تھے اورمزید بدقسمتی یہ کہ وہاں مغربی پاکستانی فوج کی تعداد سب سے کم تھی۔اسی لئے وہاں مغربی پاکستانیوںاوربہاریوں کاقتل عام بہت زیادہ ہوااور انہیں سخت اذیتیں دے دے کر مارا گیا۔مختلف ذرائع کے مطابق تقریباً بیس ہزاربے گناہ لوگ بنگالیوں کے ہاتھوں چٹاگانگ میں قتل ہوئے یا سخت زخمی ہوئے۔
25مارچ 1971ء کو جب سیاسی بات چیت ناکام ہوئی اورفوجی کارروائی کااعلان ہواتوتمام بنگالیوں نے مغربی پاکستانیوں کیخلاف مسلح بغاوت کردی جس کیلئے وہ پہلے ہی سے تیارتھے۔انہوں نے بہاریوںاورمغربی پاکستانیوں پر قیامت ڈھا دی اوردرندگی کے وہ مظاہرے کئے جن کے سامنے چنگیز خان اور ہلاکو خان کے مظالم بھی شرما جائیں۔26مارچ کو چٹاگانگ کی بندرگاہ پر مغربی پاکستان سے کچھ سامان لے کر ایک بحری جہاز پہنچا۔اطلاع ملی کہ مکتی باہنی کے غنڈے وہ جہاز لوٹنے کی تیاری کر رہے ہیں۔لہٰذاکرنل جنجوعہ نے میجر ضیاء الرحمٰن کو بھیجا کہ وہ ذاتی طور پر بندرگاہ پر جائے اوراپنی نگرانی میں سامان اتروائے ۔میجر ضیاء کے مکتی باہنی اورتحریک آزادی بنگلہ دیش کے مسلح کارکنوں سے پہلے سے رابطے تھے۔ بندرگاہ پر جانے کی بجائے یہ سیدھے انکے ہیڈ کوارٹر پہنچے ۔بغاوت اور قتل و غارت کیلئے سیکٹرکمانڈرز پہلے ہی مقررکررکھے تھے جنہیںاس نے فوری طور پر کارروائی کا حکم دیا اورخود واپس یونٹ میں آگیا۔چند سپاہیوں کے ساتھ کمانڈنگ آفیسر کے بنگلہ پر پہنچا اُسے زیرِ حراست لیکر دفتر لے آیا۔ وہاں اسے کرسی کے ساتھ باندھ کر اسکے اُردلی سے اذیت ناک طریقے سے اسے شہیدکروادیا۔یونٹ کی کمان خود سنبھال لی اوربغاوت کا اعلان کر دیاجس کیلئے پہلے ہی یونٹ کو اس نے تیارکررکھاتھا ۔یادرہے کہ یہ تمام کی تمام یونٹ بنگالی سپاہیوں پر مشتمل تھی جو چند مغربی پاکستانی آفیسرز یا جے سی اوز تھے انہیں بھی شہید کر دیا گیا۔ یونٹ کو اس نے مختلف بغاوتی کارروائیوں پر روانہ کیااورخود چند سپاہیوں کے ساتھ ریڈیو سٹیشن پہنچا جس پر پہلے ہی مکتی باہنی کا قبضہ تھا ۔لہٰذا27مارچ کی رات کواس نے شیخ مجیب الرحمن کی طرف سے بنگلہ دیش کیلئے اعلان ِآزادی کیا کیونکہ شیخ صاحب اسوقت تک گرفتار ہو چکے تھے۔خود آزادبنگلہ دیش آرمی کا کمانڈراِن چیف اورشیخ مجیب کی واپسی تک صدربنگلہ دیش بن جانے کا اعلان کیا۔
اس اعلان کیساتھ ہی اِسے یہ اندازہ تھا کہ چٹاگانگ میں جوبھی تھوڑے بہت مغربی پاکستانی فوجی ہیں وہ جلد یابدیر ضرور ریڈیو سٹیشن پر قبضہ کر لیں گے۔ لہٰذااس نے فوری طور پر ’’سوادھن بنگلہ بیتارکِندرا‘‘ (آزاد بنگال ریڈیو سٹیشن) کے نام سے ایک علیحدہ نشریاتی سٹیشن قائم کیا۔ یہ ریڈیو سٹیشن کا کسنر (Cox's) بازارکے نزدیک کلور گھاٹ کے علاقے میں قائم کیا گیا تھا۔وہاں اس نے باقاعدہ نشریات کا آغاز کیا جس میں پاکستان آرمی کے بنگالیوں کیخلاف مبینہ مظالم کی خوفناک کہانیاں سنائیںاورحکم دیا کہ پاکستان فوج اور پاکستانی لوگوں کیخلاف ہر بنگالی اٹھ کھڑا ہواوراپنے خلاف ہونیوالے مظالم کا بدلہ لے۔کسی پاکستانی کو زندہ نہ چھوڑے نیز یہ بھی اعلان کیا کہ آزادبنگلہ دیش فوج اس وقت پاکستان فوج کیخلاف برسرِ پیکارہے اورپاکستان فوج برے طریقے سے شکست کھا کر بھاگ رہی ہے۔ انہیں مت چھُپنے دیںبلکہ آگے بڑھ کر ختم کردیں۔ایک بھی بچنے نہ پائے۔مزید یہ کہ پاکستانی فوج بنگالیوں سے بہت خوفزدہ ہے۔وہ مختلف مقامات پرمارکھا کر ہتھیارڈال رہی ہے۔انہیں ختم کر دیں۔اس اعلان کا بنگالیوں پر بہت اثر ہوا اورپورا مشرقی پاکستان خون میں نہا گیا۔بھارت جو ایسے موقع کے انتظار میں تھا،نے باغیوں کی بھرپور طریقے سے مددکی اورنومبر1971ء میں حملہ کرکے پاکستان کو دولخت کر دیا۔کچھ رپورٹس کیمطابق بنگالیوں نے تقریباً ایک لاکھ بہاری اورمغربی پاکستانی قتل کئے۔