کراچی کی بہادر آباد چورنگی دنیا کی 12 انوکھ

**intelligent086** · 08-23-2015, 10:24 AM

کراچی کی بہادر آباد چورنگی دنیا کی 12 انوکھی اور خوبصورت چورنگیوں میں شامل

برطانوی ویب سائٹ کے مطابق بہادر آباد چورنگی پر تعمیر مسجد نما عمارت کو ایک انوکھی اختراع قرار دیا گیا ہے، فوٹو:فائل

لندن: کراچی کے مصروف علاقے بہادرآباد میں 4 سڑکوں کے سنگم پر واقع بہادر آباد چورنگی کو اس سال دنیا کی چھٹی انوکھی اور خوبصورت چورنگیوں میں سے ایک قرار دیا گیا ہے۔

برطانیہ میں راؤنڈ اباؤٹ (چورنگی) اپریسی ایشن سوسائٹی کی جانب سے جاری کی جانے والی فہرست میں چھٹا نمبر کراچی میں واقع بہادر آباد چورنگی کو دیا گیا ہے جس کے مرکز میں ایک خوبصورت مسجد نما ماڈل تیار کیا گیا جسے برطانوی سوسائٹی نےایک اہم اختراع قرار دیتے ہوئے اپنی جیوری کے سامنے پیش کیا اور اسے اس سال کے لیے پوری دنیا کی اہم چورنگیوں میں سے ایک قرار دیا گیا ہے۔

اس مقابلے میں پہلا نمبر ہوبرٹ آسٹریلیا میں واقع ریلوے چورنگی کو دیا گیا ہے جس کی خوبصورتی رنگ بدلنے والا فوارہ ہے جو رات کے وقت دیکھنے والوں پر اپنا سحر طاری کرتا ہے۔

دوسرے نمبر پر فرانس کا ایک سرسبز چوراہا ہے جس پر ایک قدیم گھڑی اور موربیئر پنیر کا ماڈل رکھا گیا ہے اس کی خاص بات یہ ہے کہ اس پر گھڑی پودوں کو تراش کر بنائی گئی ہے۔

برطانیہ میں کینٹ میں واقع بطخوں والا چوراہا بہت مشہور ہے جسے ڈکنگھم پیلس بھی کہا جاتا ہے اور اسے 2015 کے 12 بہترین چوراہوں میں تیسرا نمبر دیا گیا ہے جب کہ چوراہے کے وسط میں پانی ہے جس پر بطخیں موجود رہتی ہیں اور اطراف میں بید کے درخت ہیں۔

وینیزویلا کے شہر مناگوا میں آنجہانی صدر ہیوگو شاویز کی تصویر والے چوراہے کو چوتھا نمبر دیا گیا ہے اس پر لکڑی کے ایک بڑے ٹکڑے پرشاویز کی تصویربناکر اس پر رنگ بھرے گئے ہیں۔

پانچویں نمبر پر آزادی کا فرشتہ ( اینجل آف انڈی پینڈینس) کا چوراہا رہا جو میکسکو سٹی کے قلب میں واقع ہے اس پر 118 فٹ طویل ستون تعمیر کیا گیا ہے۔

کراچی میں واقع بہادر آباد چورنگی کو برطانوی ویب سائٹ نے مسجد چورنگی کا نام دیا ہے اگرچہ یہ ایک مسجد نما تعمیر ہے جسے چوبارہ بھی قرار دیا جاسکتا ہے اور اسے دنیا کی بہترین چورنگیوں میں چھٹا نمبر دیا گیا ہے۔

اس کے علاوہ پتایا تھائی لینڈ میں واقع ڈولفن چورنگی کو ساتواں، سوئزرلینڈ میں واقع مجسمہ چورنگی کو آٹھواں، امریکی شہر انڈیانا میں واقع پھولوں بھرے چوراہے کو نواں، پرتگالی شہر الگروا کے ڈولفن چوراہے کو دسواں، شیزوکا جاپان میں سیکی گیٹا چوراہے کو گیارہواں اور بحرین کے شہر مناما کے موتی چورنگی کو بارہواں نمبر دیا گیا ہے۔