Attention Guest, if you are not a member of Urdu Tehzeb, you have 1 new private message waiting, to view it you must fill out 
Ye mojaza bhi mohabbat kabhi dikhaaye mujhe,
ki sang tujh pe gire aur zakhm aaye mujhe.
Main apne paanv tale raundta hun saaye ko,
badan mera hi sahi dopehar na bhaaye mujhe.
Barang-e-uud milegi usey meri khushboo,
woh jab bhi chaahe bade shauq se jalaaye mujhe.
Main ghar se teri tamanna pehan ke jab niklun,
barhana shehar mein koi nazar na aaye mujhe.
Wohi toh sab se zyada hai nukta-chin mera,
jo muskura ke humesha gale lagaaye mujhe.
Main apne dil se nikaalun khyaal kis kis ka,
jo tu nahin toh koi aur yaad aaye mujhe.
Zamana dard ke sehra tak aaj le aaya,
guzaar kar teri zulfon ke saaye saaye mujhe.
Woh mera dost hai saare jahaan ko hai maaloom,
dagha kare woh kisi se toh sharm aaye mujhe.
Wo meharbaan hai toh iqraar kyon nahin karta,
woh badgumaan hai toh sau baar aazmaaye mujhe.
Main apni zaat mein neelaam ho raha hun ‘qateel
ghum-e-hayaat se keh do khareed laaye mujhe. !!
Reply With Quote
Originally Posted by intelligent086
Bookmarks