ایک کہانی بڑی پرانی!

**intelligent086** · 04-07-2016, 08:11 AM

ایک شیر بڈھا ہو کر کمزور ہو گیا۔ اب اس کی وہ اچھل کود، دوڑ دھوپ، سب جاتی رہی۔ جوان شیر آدمی پر حملہ نہیں کرتا، ہاں، بڈھا ہو کر آدمی کو مار ڈالتا ہے۔ دوسرا وہ شیر جو لگور ہو، یہ اور بات ہے، مگر شیرنی آدمی کو مار ڈالتی ہے اور اگر اس کے بچے ہوں تو پھر تو یہ بلا ہے اور شیرنی ہی پر کیا موقوف ہے۔ ہر شکاری جانور کی مادہ، عام یہ کہ وہ پرندہی ہو، بہ نسبت نر کے زیادہ شدید ہوتی ہے۔ غرض یہ شیر بڈھا ہو گیا۔ اس نے یہ خیال کیا کہ اب شکار کا ہاتھ آنا تو مشکل ہے۔ اس سے بہتر یہ ہے کہ تو ایک گڑھے میں پڑارہ۔ جانور تیری مزاج پرسی کو آئیں گے، جو آئے گا، اسے آرام سے کھا لیا کروں گا چنانچہ شیر نے ایسا ہی کیا، جو جانور آتا، شیر اسے کھا جاتا۔ ایک روز ایک لومڑی آئی۔ لومڑی تو مکار بازی میں مشہور ہے۔ لومڑی نے غار کے قریب آکر دیکھا کہ گڑھے کے سرے پر جانور کے اندر جانے کے قدموں کے نشان تو ہیں، لیکن باہر آنے کا کوئی نشان نہیں۔ لومڑی یہ دیکھ کر معاملے کو بھانپ گئی۔ اسے معلوم ہو گیا کہ جو اندر گیا، شیر اسے کھا گیا۔ یہ سوچ کر لومڑی نے باہر ہی سے شیر کو آواز دی کہ ’’اے بادشاہ، نصیب اعدا ، حضور کے مزاج کی کیا حالت ہے؟‘‘ شیر نے جواب دیا کہ ’’یہاں آئو اور میری حالت دیکھو کہ میں کیسے مرض میں مبتلا ہوں‘‘۔ لومڑی نے شیر کی آواز سنی اور خیال کیا کہ یہ جملہ جو شیر کی زبان سے نکلا ہے، مریض بحالت مرض ایسا بے تکان کب بول سکتا ہے۔ اس سے صاف ظاہر ہے کہ شیر مکر کرتا ہے کہ میں اندر جائوں اور وہ مجھے کھا جائے چنانچہ لومڑی نے جواب دیا کہ ’’اے بادشاہ تجھ کو خدا تندرست رکھے۔ مجھ سے آپ کے مرض کی حالت کب دیکھی جائے گی کہ آپ بوجہ مرض کے باہر تک تشریف نہیں لاسکتے۔ مجھے یہاں آکر اور یہ حالت دیکھ کر سخت ملال ہوا۔ لہٰذا میں تمام جانوروں کو جمع کر کے کسی متبرک جگہ جا کر خدا سے جناب کی صحت کی دعا مانگتی ہوں کہ خدا رحم فرمائے‘‘۔ غرض یہ لومڑی روانہ ہوئی۔ اب لومڑی نے غور سے آواز سن کر یہ نتیجہ نکالا اور ذہن نے مشورہ دیا۔ذہن ایسی ہی شے ہے کہ اگر آپ اس سے کام لیں ،تو ہزاروں آفتوں سے بچاتا ہے اور آدمی کو آدمی بنا دیتا ہے۔ اگر ہم پابندی کرنے لگے، تو تم دنیا میں جیسا بننا چاہتے ہو، ویسی ہی باتیں سن کر پابندی کرو، ویسے ہی جائو گے۔ دنیا میں جو بنا اچھی باتیں سن کر اور ان کی پابندی کر کے بنا۔ دنیا تو کام کرنے والے کو چاہتی ہے۔ یوں خدا چاہے تو دے، لیکن یہ دیکھا گیا ہے کہ وہ بھی حق دار ہی کا خیال رکھتا ہے۔ اگر قدرت کو یہ منظور ہوتا کہ بے محنت دے، تو ہم کو ایسے ڈھیلے اعضاء نہ دیتی۔ تو تم کیا ہوتے؟ ایک گوشت کا لوتھڑا ہوتے اور ایک ہی جگہ پڑے رہتے۔ ہم کو تو ہمارے اعضاء بتا رہے ہیں کہ ہم بے کار نہیں ہیں۔ دنیا میں ہم کو دو چیزیں نظر آتی ہیں، ایک نیکی، دوسری بدی اور اکثر صاحب نیکی اور بدی کو خدا کی طرف منسوب کرتے ہیں۔ یہ خیال غلط ہے کیونکہ بلاتشبیہ نہ خدا ناقص ہے نہ خدا نے بدی پیدا کی۔ بدی تو ہم پیدا کرتے ہیں اور جب ہم نیکی کو چھوڑتے ہیں تو بلا خوف بدی میں ڈوب جاتے ہیں کیونکہ دنیا میں جو کچھ ہے اور ہو رہا ہے اور ہو گا، یہ سب زمانے ہی کے پیٹ میں ہے اور زمانہ اگر آنوں پر تقسیم ہے تو ہم آن کو بتاہی نہیں سکتے کہ کتنے چھوٹے سے وقفے کو آن کہتے ہیں اور دنیا میں خلا محال ہے۔ بس پھر کیا ہوتا ہے کہ نیکی چھوڑی اور ساتھ ہی بدی میں ڈوبے۔ بس پھر یہ مرض لا علاج ہے اور کسی نے خوب کہا ہے کہ ’’خود کردہ اعلاجے نیست‘‘ اور کچھ نہ سہی، نیکی کا چھوڑنا ہی بدی ہے۔ بری بات نہ سنو اور نہ بری بات زبان سے نکالو۔ ؎مزن فالِ بد کاورد حالِ بد (کاناباتی از: میرباقر علی داستان گو