SHAREHOLIC
  • You have 1 new Private Message Attention Guest, if you are not a member of Urdu Tehzeb, you have 1 new private message waiting, to view it you must fill out this form.

    + Reply to Thread
    + Post New Thread
    Results 1 to 5 of 5

    Thread: مکہ کے جگر کا ٹکڑا

    1. #1
      Administrator Admin intelligent086's Avatar
      Join Date
      May 2014
      Location
      لاہور،پاکستان
      Posts
      38,412
      Threads
      12102
      Thanks
      8,639
      Thanked 6,948 Times in 6,474 Posts
      Mentioned
      4324 Post(s)
      Tagged
      3289 Thread(s)
      Rep Power
      10

      مکہ کے جگر کا ٹکڑا

      مکہ کے جگر کا ٹکڑا


      قریش میں تین آدمی ایسے تھے جنھوں نے رسول اللہﷺ کی دعوت کی سخت مزاحمت کی اور آپﷺ کے صحابہؓ کوشدید عقوبتوں سے دوچار کیا کہ آپﷺ ان بدبختوں کے حق میں بد دعا کرنے پر مجبور ہو گئے۔ اللہ تعالیٰ ان پر اپنا عذاب نازل کردے۔ جب آپﷺ بار بار یہ بد دعا کرتے رہے، تو اللہ تعالیٰ نے آپﷺ کے قلب مبارک پر یہ آیت کریمہ نازل فرمائی: (اے پیغمبرﷺ)فیصلہ کے اختیارات میں تمھارا کوئی حصہ نہیں، اللہ کو اختیار ہے کہ چاہے انھیں معاف کرے، چاہے سزا دے کیونکہ وہ ظالم ہیں۔
      یہ آیت نازل ہوئی، تو رسول اللہﷺ سمجھ گئے کہ اس میں بد دعا سے رک جانے کا حکم ہے۔ لہٰذا آپﷺ نے ان لوگوں کا معاملہ اللہ پر چھوڑ دیا کہ اگر یہ اپنے ظلم پر قائم رہتے ہیں، تو اللہ ان پر اپنا عذاب نازل کرے یا ان پر مہربان ہوجائے اور وہ اس کی طرف پلٹ آئیں، تو اس کی رحمت ان کو ڈھانپ لے اور وہ عذاب سے بچ جائیں۔ قریش کے ان تین آدمیوں میں سے ایک حضرت عمرؓوبن العاص تھے۔ اللہ تعالیٰ نے ان لوگوں کے لیے توبہ کا راستہ کھول دیا اور ان کے اوپر اپنی رحمت کرتے ہوئے انھیں اسلام کی ہدایت نصیب فرمائی، تو جناب عمروبن العاصؓ ایک اطاعت شعار مسلمان اور اسلام کے بہادر کمانڈر میں تبدیل ہوگئے۔
      حضرت عمروبن العاصؓ اوّلین مسلمانوں میں سے نہیں تھے۔ آپؓ حضرت خالدؓ بن ولید کے ہمراہ فتح مکہ سے کچھ دیر پہلے اسلام لائے۔ حیرانی کی بات یہ ہے کہ آپؓ کے اسلام کی اِبتدا حبشہ کے حکمران جناب نجاشی کے ہاتھوں ہوئی۔ بکثرت حبشہ جانے اور جناب نجاشی کے لیے قیمتی تحائف لے جانے کی وجہ سے حضرت نجاشی آپؓ کو جانتے تھے اور آپؓ کا احترام کرتے تھے۔ آپؓ کے آخری سفر حبشہ کے دوران جناب نجاشی سے ملاقات کے موقع پر رسول اللہﷺکا تذکرہ ہوا۔ شاہِ حبشہ نے آپؓ سے پوچھا کہ اس آدمی پر ایمان کیوں نہیں لاتے اور اس کا اتباع کیوں نہیں کرتے جب کہ وہ اللہ کی طرف سے سچا رسول ہے؟
      آپؓ نے حضرت نجاشی سے یہ کہتے ہوئے پوچھا:کیا وہ ایسا ہی ہے؟
      جناب نجاشی نے جواب دیا:ہاںعمرو!میری بات مانو اور اس کا اتباع کرلو۔ اللہ کی قسم وہ حق پر ہے۔ وہ اپنے مخالفین پر ضرور غالب آکر رہے گا! اس گفتگو کے بعد حضرت عمرو ؓؓ فوراً اپنے وطن واپسی کے لیے عازم سفر ہوگئے۔ اللہ رب العالمین پر ایمان لے آنے کی غرض سے مدینے کا رُخ کرلیا۔ راستے میں حضرت خالد بن ولیدؓ سے ملاقات ہوگئی جو مکہ سے آرہے تھے۔ یہ بھی رسالت مآب ﷺ کے دست مبار ک پر بیعت ہونے کے ارادے سے آئے تھے۔رسول ﷺ نے جونہی ان دونوں کو آتے دیکھا، تو آپﷺ کا روئے مبارک شاداں و تاباں ہوگیا۔ آپﷺ نے اپنے ساتھیوں سے فرمایا: مکہ نے اپنے جگر کے ٹکڑوں کو تمھاری طرف پھینک دیا ہے۔
      دربارِ رسالتؐ میں پہنچ کر جناب خالدؓ آگے بڑھے اور دست رسولﷺ پر بیعت کی۔ پھر حضرت عمرو ؓ کی باری آئی، تو آپؓ نے رسول اللہﷺ سے عرض کیا: یارسول اللہﷺ! میں آپﷺسے اس شرط پر بیعت کرتا ہوں کہ اللہ تعالیٰ میرے گذشتہ گناہوں کو معاف فرمادے! رحمت للعالمینﷺ نے فرمایا: عمرؓو!بیعت کرو!اسلام پہلے(گناہوں) کی ہر چیز مٹا ڈالتا ہے!
      حضرت عمروؓ نے بیعت کی اور اپنی ہوشیاری و چالاکی اور شجاعت و بسالت کو دین اسلام کی خدمت پر لگا دیا۔ جب رسول اکرمﷺ کا وصال ہوا، تو جناب عمروؓ ، عمان کے گورنر تھے۔ خلافت فاروقیؓ میں آپؓ نے شام کی جنگوں اور پھر مصر کو روم سے آزادی دلانے کے لیے دادِ شجاعت دی۔ ان بعض مواقع کے باوجود جن میں ان کے نقطۂ نظر سے اختلاف کی گنجائش موجود ہے، آپ ؓ کا ایک جلیل القدر صحابی کی حیثیت سے کردار ہمیشہ آپؓ کے چہرے کی تابانی سے ہمارے قلب و نظر کو منور کرتا رہے گا۔
      اللہ تعالیٰ نے اسلام کو مصر کے لیے اور مصر کو اسلام کے لیے تحفہ آپؓ کے ذریعے بنایا۔ سرزمین مصر میں جن لوگوں نے اسلام کی صورت میں ایک اعلیٰ و ارفع دین کو دیکھا وہ اس عظیم آدمی سے ٹوٹ کر محبت کرنے والے بن گئے۔ مؤرخین نے جناب عمروؓ کو فاتح مصر کے نام سے یاد کیا ہے لیکن ہمارے نزدیک اس لفظ کے معنی میں اِختصار بھی ہے اور اِفراط بھی! جناب عمروؓ صحیح حقدار اس بات کے ہیں کہ ہم آپؓ کو محررِمصر(آزادی دہندۂ مصر)کہیں۔
      کیونکہ اسلام نے لفظ فتح کے معنی کے اعتبار سے ملکوں کو فتح نہیں کیا تھا بلکہ اسلام تو انھیں ان دو شہنشاہتوں کے پنجۂ استبداد سے چھڑا رہا تھا جنھوں نے انسانوں کو بدترین عذاب سے دوچار کررکھا تھا۔ یہ دونوں شہنشاہتیں، ایران و روم کی تھیں اور مصر اس وقت رومیوں کا باجگزار تھا، جب لشکر اسلام نے وہاں قدم رکھے۔ جب اہل ایمان کے لشکروں کی صدائے تکبیر بلادِمصر کی گھاٹیوں سے بلند ہوئی تو اہل مصر نے اسے روم سے نجات کی تمہید سمجھا اور کشادہ بازوئوں اور کھلے چہروں سے ان لشکروں کو خوش آمدید کہا۔
      حضرت عمرؓوبن العاص اور آپؓ کے لشکر نے نہ صرف مصر کو فتح کیا بلکہ اس کے سامنے ایسی راہ کھول دی کہ وہ اپنے مقدر کو حق کے ساتھ وابستہ کرلے اور کلمات الٰہی اور اصولِ اسلام کی روشنی میں اپنے آپ کو دیکھ لے۔
      جناب عمرؓوبن العاص کی دلی خواہش یہ تھی کہ اہلِ مصر اور اس کے قبطی جنگ سے علیحدہ رہیں تاکہ جنگ صرف آپؓ کے اور ان رومی لشکروں کے درمیان ہو جو ان علاقوں کو دبائے بیٹھے ہیں اور اس کے باشندوں کا لقمۂ دہن بھی چھین لیتے ہیں۔ جب ہم آپؓ کو نصرانی زعما اور پادریوں سے مذاکرات کرتے دیکھتے ہیں، تو آپؓ یہ کہتے سنائی دیتے ہیں:
      اللہ تعالیٰ نے محمدﷺ کو حق کے ساتھ بھیجا اور اس کا حکم دیا اور آپﷺ نے اپنی رسالت کا حق ادا کیا اور ہمیں ایک واضح راستے پر ڈال دینے کے بعد دنیا سے چلے گئے۔
      آپﷺنے ہمیں جن باتوں کا حکم دیا ان میں سے ایک یہ ہے کہ ہم دوسروں کو گفتگو کا موقع دیں۔ لہٰذا ہم تمھیں اسلام کی دعوت دیتے ہیں جو اس دعوت کو قبول کرلے وہ ہم میں سے ہے، اس کے لیے وہی حقوق ہیں جو ہمارے لیے ہیں اور اس کے اوپر وہی فرائض عائد ہوتے ہیں جو ہمارے اوپر عائد ہیں اور جو اسلام کی طرف دی جانے والی ہماری دعوت قبول نہ کرے اس کے اوپر ہم جزیہ عائد کرتے ہیں اور اس کی حفاظت و دفاع کا ذمہ اپنے سر لیتے ہیں۔
      ہمارے نبیﷺ ہمیں بتا گئے ہیں کہ عنقریب مصر تمھارے لیے فتح ہوجائے گا۔آپﷺ نے ہمیں اس کے باشندوں سے اچھا سلوک کرنے کی نصیحت کی ہے۔ آپﷺ نے فرمایا: عنقریب مصر تمھارے لیے فتح ہوجائے گا لہٰذا اس کے قبطیوں سے اچھا سلوک کرناکیونکہ اُن کے ساتھ ہماری ایک لحاظ سے رشتہ داری جو ہے۔ لہٰذا جس چیز کی دعوت ہم نے تمھیں دی ہے اگر تم نے اس کو قبول کرلیا تو تمھارے لیے ضمانت ہے۔!!
      حضرت عمروؓ بن العاص اپنی بات سے فارغ ہوئے تو کئی پادری اور راہب پکار اٹھے: جس رشتے کا خیال رکھنے کی تمھارے نبیﷺ نے تمھیں نصیحت کی ہے وہ بڑا دور کا رشتہ ہے یہاں تک انبیا کے سوا کوئی نہیں پہنچ سکتا!! یہ گفتگو اس باہمی مصالحت کی ابتدا تھی جو جناب عمروؓ اور اَقباطِ مصر کے درمیان متوقع تھی حالانکہ اس کو سبوتاژ کرنے کے لیے رومی کمانڈروں نے بہت کوشش کی۔
      حضرت عمروؓ کی ظاہری شکل و صورت، چال ڈھال اور طرزِ گفتگو اس جانب اشارہ کرتی تھی کہ آپؓ حکمرانی کے لیے ہی پیدا ہوئے ہیں۔ اس بارے میں یہاں تک بیان کیا گیا ہے کہ ایک روز حضرت عمر بن خطابؓ نے آپؓ کو آتے دیکھا، تو آپؓ کی چال پر مسکرادیے۔ پھر فرمایا: ابو عبداللہ بحیثیت حکمران ہی زمین پر چلتا جچتا ہے! اور سچ تو یہ ہے کہ ابو عبداللہ نے بھی اپنے آپؓ کو اس کا حقدار ثابت کرنے میں کسی بخل سے کام نہ لیا۔
      جب خطرناک واقعات مسلمانوں پر تباہی مسلط کیے ہوئے تھے، تو جناب عمروؓ ان حادثات میں ذہانت و ہوشیاری اور صلاحیت کے ساتھ ایسا کردار ادا کررہے تھے جو آپؓ کو اپنے نفس پر اعتماد اور اس کی بلندی پر یقین میں مزید پختہ کررہا تھا۔ لیکن آپؓ کی امانت و دیانت ایسی تھی جس کی بنا پر حضرت عمر بن خطابؓ آپؓ کو فلسطین و اُردن اور پھر مصر کی گورنری کے لیے منتخب کر رہے تھے اور جب امیر المومنین حضرت عمرؓ کو معلوم ہوا کہ جناب عمروؓ اپنی معاشی خوشحالی میں اس حد سے تجاوز کرگئے ہیں جس کا حضرت عمرؓ اپنے والیوں (گورنروں) سے مطالبہ کرتے تھے کہ وہ اس سے آگے نہ بڑھیں تاکہ وہ ہمیشہ اس سطح پر یا کم از کم اس سطح سے قریب رہیں
      جو عامتہ الناس کی ہوتی ہے، تو حضرت عمرؓ نے آپؓ کو معزول نہ کیا البتہ محمد بن مسلمہؓ کو آپؓ کی طرف بھیجا اور حکم دیا کہ عمرؓو کے تمام اموال و اشیا کو دو حصوں میں تقسیم کرو اور ایک حصہ بیت المال میں جمع کرانے کے لیے لے آئو! حضرت عمروؓبن العاص ذہانت میں تیز، اظہار رائے میںمضبوط اور معاملہ فہمی میں دور اندیش تھے۔ آپؓ کو ان صفات میں اس قدر اعلیٰ صلاحیت عطا ہوئی تھی کہ امیر المومنین حضرت عمرؓ بھی اس کا اعتراف کیا کرتے تھے۔ حضرت عمرؓ جب کسی آدمی کو دائو پیچ میں بے بس دیکھتے تو ہاتھ پر ہاتھ مار کر کہتے:سبحان اللہ! اس کو پیدا کرنے والا اور عمرؓوبن العاص کو پیدا کرنے والا تو ایک ہی اِلہٰ ہے!
      اسی طرح آپؓ جرأت و پیش قدمی میں بھی آخری حدوں کو پہنچے ہوئے تھے۔ کئی مواقع پر آپؓ نے اپنی ذہانت کو جرأت کے ساتھ شامل کرلیا، تو اس کو بزدلی خیال کیا گیا حالانکہ یہ دائو پیچ کاہی ایک اظہار تھا۔ آپؓ تباہ کن بند راستوں میں گھر جانے کے موقع پر حیلہ سازی کو حیران کن مہارت سے استعمال میں لاتے! امیرالمومنین حضرت عمربن خطابؓ آپؓ کی ان صلاحیتوں کو جانتے تھے اور بخوبی ان کاادراک رکھتے تھے۔ جب حضرت عمرؓ نے آپؓ کو مصر کی طرف بھیجنے سے قبل شام کی طرف بھیجا، تو لوگوں نے کہا شام میں رومی لشکر کی کمانڈارطبون کررہا ہے۔ یعنی مقابلے میں ایک ایسا کمانڈر ہے جو حد سے بڑھے ہوئے چالاک دلیر کمانڈروں میں سے ہے، تواس موقع پر جناب عمرؓ بن خطا ب کا جواب تھا:ہم نے ارطبونِ روم کے مقابلے میں ارطبونِ عرب کو بھیجا ہے، دیکھتے رہو کہ صورتِ حال کیسے واضح ہوتی ہے!
      پھر صورت حال ارطبونِ عرب جنابِ عمروؓ بن العاص کے ارطبونِ روم پر ہلاکت آمیز غلبہ کے ساتھ واضح ہوگئی۔ ارطبونِ روم اپنا لشکر چھوڑ کر مصر کی طرف بھاگ کھڑا ہوا لیکن حضرت عمروؓ کچھ دیر بعد یہاں پہنچنے والے تھے تاکہ مصر کے پُرامن گوشوں میں اسلام کا پرچم لہرائیں! اگر ہم آپؓ کی کمال ہوشیاری اور حاضر جوابی کا مشاہدہ کرنا چاہیں، تو روم کے ساتھ ہونے والی جنگوں کے دوران مصر میں قلعہ بابلیون کے کمانڈر کے ساتھ ہونے والی آپؓ کی گفتگو کو پڑھنا چاہیے۔ ایک دوسری تاریخی روایت میں ہے کہ یہ واقعہ یرموک میںارطبونِ روم کے ساتھ پیش آیا۔ بہرحال واقعہ حروبِ روم کے دوران مصر میں پیش آیا ہو یا یرموک میں، ہمارا مقصد جناب عمرو ؓبن العاص کی کمال ہوشیاری کا تذکرہ ہے۔
      واقعہ یہ ہے کہ جب ارطبون یعنی کمانڈر نے آپ کو بات چیت کے لیے دعوت دی، تو اس نے اپنے کچھ آدمیوں کو حکم دے رکھا تھا کہ جب یہ مسلمان کمانڈر قلعہ کے اندر آجائے، تو اس کے واپسی کے راستے پر پتھر ڈال دو تاکہ جب ان پتھروں سے گزر کر وہ واپس جانے لگے، تو اس کو گھیر کر مار ڈالنا ممکن ہوسکے۔ جناب عمروؓ رومی کمانڈر کے پاس آئے، تو اس وقت وہاں کا ماحول بالکل اطمینان بخش تھا۔ کسی قسم کی کوئی مشکوک صورت حال نہ تھی۔ ملاقات ہوئی، اختتام کو پہنچی اور حضرت عمروؓ قلعہ سے باہر جانے کے لیے مڑے، ابھی دو چار قدم ہی اُٹھائے تھے کہ قلعہ کی دیواروں پر کچھ مشکوک حرکات ہوتی دیکھیں جس سے خطرہ محسوس ہوا۔
      یہ دیکھ کر آپؓ فوراً بڑے اطمینان اور بے خوف انداز میں مسکراتے اور پُراعتماد چہرے کے ساتھ واپس رومی کمانڈر کے پاس آئے کہ گویا آپؓ کسی چیز سے کبھی خوفزدہ ہوئے ہی نہیں اور کوئی شک و شبہ آپؓ کے ذہن میں داخل ہی نہیں ہوا۔ آپؓ کمانڈر کے پاس گئے اور اس سے کہا:مجھے آپ کو ایک بات بتانا یاد نہیں رہا۔ دراصل جہاں میں مقیم ہوں وہاں میرے ساتھ رسول اللہﷺ کے ان اوّلین ساتھیوں کی ایک جماعت ہے جن کا مشورہ لیے بغیر امیر المومنین کوئی فیصلہ نہیں کرتے اور اسلام کا کوئی لشکر ان کی قیادت اور کمانڈر کے بغیر نہیں بھیجتے۔ میرا خیال ہے کہ میں ان کو بھی تمھارے پاس لے آئوں تاکہ وہ بھی تمھاری بات اسی طرح سن لیں جس طرح میں نے سنی ہے اور جس طرح معاملہ میرے اوپر واضح ہوا ہے ان کے اوپر بھی واضح ہوجائے۔
      رومی کمانڈر نے جناب عمروؓ کی اس بات کو سادگی پر محمول کیا اور سمجھا کہ اس کی مہلتِ عمر تو اب پوری ہوچکی ہے۔ یہ ہماری اس تدبیر سے بچ کر کہاں جاسکتا ہے لہٰذا اس کی تجویز سے اتفاق کر لینے میں کیا مضائقہ ہے اور پھر حضرت عمروؓ کی بات سے اتفاق کرلیا۔ اگلی صبح جب آپؓ اپنا لشکر لے کررومی کمانڈر سے ملاقات کے لیے آئے، تو زعمائے مسلمین، نوجوانانِ اسلام اور لشکر اسلام کے اسلحہ سے لیس بڑے بڑے کمانڈر آپؓ کے ہمراہ تھے۔ آپؓ اپنی اس گھوڑی پر سوار تھے جو عجیب تمسخر آمیز انداز میں ہنہنا رہی تھی۔ شاید یہ گھوڑی بھی اپنے مالک کی ذہانت اور کمال ہوشیاری سے بخوبی واقف تھی!
      اس طرح آپؓ نے رومی کمانڈر کی اس تدبیر کو ناکام بنا دیا جو اس نے آپؓ کو قتل کرنے کے لیے اختیار کی تھی۔ 43ہجری میں آپؓ نے مصرمیں وفات پائی۔ اُن دنوں آپؓ وہاں کے گورنر تھے۔ زندگی کے ان آخری لمحات میں آپؓ نے اپنی زندگی پر یوں تبصرہ کیا: پہلے میں کافر تھااس وقت میں رسولﷺ کا شدید ترین مخالف تھا۔ اگر ان دنوں مجھے موت آجاتی، تو جہنم میرے اوپر واجب ہوجاتی! پھر میں نے رسولﷺ سے بیعت کی تو میری آنکھوں میں رسول اللہﷺ سے زیادہ محبوب اور جلیل القدر کوئی نہ رہا۔ اگر مجھ سے یہ کہا جائے کہ میں اپنی بساط بھرآپﷺ کی توصیف بیان کروں تو مجھ میں یہ ہمت بھی نہیں کہ میں آپﷺ کے جلال سے اپنی آنکھیں پوری طرح بھر سکوں۔ اگر ان دنوں میں فوت ہوجاتا تو امید تھی کہ میں اہلِ جنت میں شامل ہوجاتا۔
      پھر اس کے بعد حکمرانی اور ایسی چیزوں کی صورت میں مجھ پر آزمائش آئی کہ مجھے نہیں معلوم کہ وہ میرے حق میں تھیں یا میرے خلاف! پھر آپؓ نے بڑے انکسار کے ساتھ اپنی آنکھیں آسمان کی طرف اٹھائیں اور اپنے رب سے سرگوشی کرتے ہوئے کہا: اے اللہ! تیرے سوا کوئی معاف کرنے والا نہیں لہٰذا مجھے معاف فرما! اور تیرے سوا کوئی عزیز و ناصر نہیں لہٰذا میری نصرت فرما! اے اللہ! اگر میرے اوپر تیری رحمت کا نزول نہ ہوا تو میں ہلاک ہوجانے والوں میں شامل ہوجائوں گا!
      آپؓ اپنی انہی آہ و زاریوں میں تھے کہ آپؓ کی روح محوپرواز ہوگئی۔ آپؓ کے آخری الفاظ لا اِلہٰ الا اللہ تھے۔آپؓ اسی سرزمین مصر میں آسودۂ خاک ہوئے جس کو آپؓ نے اسلام کی راہ دکھائی اور اس کی پشت پر بیٹھ کر تعلیم بھی دیتے رہے اور حکمرانی بھی کرتے رہے۔ جی ہاں مصر کی اس پرانی مسجد کی چھت کے نیچے کھڑے ہوکر جو مصر کی سب سے پہلی مسجد تھی جس میں اللہ اَحد و واحد کا نام بلند ہوا اور اس کے گوشوں سے کلام الٰہی کی نور افزا کرنوں اور اسلام کے زریں اصولوں نے قطعۂ ارضی کو منور کردیا۔ اللہ کے رسول ﷺ نے کیا خوب فرمایا تھا کہ مکہ نے اپنے جگر کا ٹکڑا تمھاری طرف پھینک دیا ہے۔ واللہ ایسا ہی تھا اور عمرو ؓبن العاص ایسے ہی تھے۔



      کہتے ہیں فرشتے کہ دل آویز ہے مومن
      حوروں کو شکایت ہے کم آمیز ہے مومن

    2. The Following 2 Users Say Thank You to intelligent086 For This Useful Post:

      Dr Danish (03-21-2017),muzafar ali (02-29-2016)

    3. #2
      Star Member www.urdutehzeb.com/public_htmlwww.urdutehzeb.com/public_html
      muzafar ali's Avatar
      Join Date
      Nov 2015
      Posts
      2,772
      Threads
      481
      Thanks
      1,142
      Thanked 1,167 Times in 923 Posts
      Mentioned
      159 Post(s)
      Tagged
      497 Thread(s)
      Rep Power
      11

      Re: مکہ کے جگر کا ٹکڑا

      jazak Allah nice work

      Kis Ki Kya Majal Thi Jo Koi Hum Ko Kharid Sakta Faraz,..Hum Tu Khud Hi Bik Gaye Kharidar DekhKe..?

    4. The Following User Says Thank You to muzafar ali For This Useful Post:

      intelligent086 (02-29-2016)

    5. #3
      Administrator Admin intelligent086's Avatar
      Join Date
      May 2014
      Location
      لاہور،پاکستان
      Posts
      38,412
      Threads
      12102
      Thanks
      8,639
      Thanked 6,948 Times in 6,474 Posts
      Mentioned
      4324 Post(s)
      Tagged
      3289 Thread(s)
      Rep Power
      10

      Re: مکہ کے جگر کا ٹکڑا







      کہتے ہیں فرشتے کہ دل آویز ہے مومن
      حوروں کو شکایت ہے کم آمیز ہے مومن

    6. #4
      Star Member www.urdutehzeb.com/public_html Dr Danish's Avatar
      Join Date
      Aug 2015
      Posts
      3,237
      Threads
      0
      Thanks
      211
      Thanked 657 Times in 407 Posts
      Mentioned
      28 Post(s)
      Tagged
      1020 Thread(s)
      Rep Power
      510

      Re: مکہ کے جگر کا ٹکڑا

      Subhan Allah
      Nice Sharing
      Jazak Allah



    7. The Following User Says Thank You to Dr Danish For This Useful Post:

      intelligent086 (03-22-2017)

    8. #5
      Administrator Admin intelligent086's Avatar
      Join Date
      May 2014
      Location
      لاہور،پاکستان
      Posts
      38,412
      Threads
      12102
      Thanks
      8,639
      Thanked 6,948 Times in 6,474 Posts
      Mentioned
      4324 Post(s)
      Tagged
      3289 Thread(s)
      Rep Power
      10

      Re: مکہ کے جگر کا ٹکڑا

      ماشاءاللہ
      پسند ، رائے اور حوصلہ افزائی کا شکریہ
      جزاک اللہ خیراً کثیرا



      کہتے ہیں فرشتے کہ دل آویز ہے مومن
      حوروں کو شکایت ہے کم آمیز ہے مومن

    + Reply to Thread
    + Post New Thread

    Thread Information

    Users Browsing this Thread

    There are currently 1 users browsing this thread. (0 members and 1 guests)

    Visitors found this page by searching for:

    Nobody landed on this page from a search engine, yet!
    SEO Blog

    User Tag List

    Tags for this Thread

    Posting Permissions

    • You may not post new threads
    • You may not post replies
    • You may not post attachments
    • You may not edit your posts
    •