آرٹسٹ ۔ آغا سید کرم علی

**intelligent086** · 02-01-2016, 04:15 AM

فن ِ مصوری،فنون ِلطیفہ میں اہم مقام رکھتی ہے۔ مصوری کے ذوق و شوق کے آثار بچپن میں ہی ظاہر ہونا شروع ہو جاتے ہیں اور بچہ دیوار پر تصاویر بنا کر اپنی صلاحیتوں کا اظہار شروع کر دیتا ہے۔ گزرتی عمر کے ساتھ اس کے فن میں پختگی آنا شروع ہو جاتی ہے۔ اکثر بڑے مصوروں کا کہنا ہے کہ وہ پیدائشی مصور ہیں جبکہ شاعری کا معاملہ بھی ایسا ہی ہے۔ شاعر کے ذہن میں آنے والا تخیل شاعری میں اور مصور کے ذہن میں آنا والا خیال پینٹنگز کی صورت میں سامنے آتا ہے۔ بنیادی طور پر شاعری کی طرح فن ِمصوری بھی دو رجحانات پر مشتمل ہے، ایک پیدائشی آرٹسٹ ہوتا ہے جبکہ دوسرا پہلو یہ ہے کہ آرٹ کی باقاعدہ تعلیم اور تکنیک حاصل کرنا پڑتی ہے۔ ہمارے ملک میں بہت سے ایسے آرٹسٹس بھی ہیں ،جن کے پاس آرٹ کی ڈگریاں تو نہیں، مگر ڈگری ہولڈر آرٹسٹ بھی اُن کے محتاج ہیں۔فطری مصور اور شاعر کو ’’آمدی‘‘ کہا جائے ،تو غلط نہ ہو گا۔ ان کی تخلیقات ہمیشہ مضبوط ثابت ہوئی ہیں، فطری تخلیقات میں قدرتی حسن نمایاں ہوتا ہے، انسان اپنی فطرت کے سامنے ہمیشہ مجبور نظر آیا ہے۔ کراچی کے اسٹریٹ آرٹسٹوں کا کہنا ہے کہ شہر میں امن و امان کی بحالی کے لئے حکومتی اقدامات سے اسٹریٹ آرٹ میں بھی بہتری کی امید پیدا ہوئی ہے۔ اسٹریٹ آرٹسٹ ہمارے معاشرے کے ایسے آرٹسٹ ہیں، جنہوں نے اپنے فن کے اظہار کے لئے آرٹ گیلری کی بجائے عوامی مراکز یعنی بازار، گلیاں اور دیگر تفریحی مقامات کا انتخاب کیا ہے۔ ایسے آرٹسٹوں کو ’’اسٹریٹ آرٹسٹ‘‘ کہا جاتا ہے۔ یہ پاکستان سمیت پوری دنیا میں موجود ہیں۔ یہ آرٹسٹ لوگوں کے پورٹریٹ اور اسکیچز بنانے کو ترجیح دیتے ہیں۔ ایسے ہی آرٹسٹ کراچی شہر میں بھی موجود ہیں۔ زیب النساء اسٹریٹ اور زینب مارکیٹ ان آرٹسٹوں کا قدیم مرکز ہے جبکہ کلفٹن (سی ویو) پر بھی ایسے آرٹسٹ اب نظر آنے لگے ہیں۔ اگر یہ کہا جائے کہ زیب النساء اسٹریٹ اور زینب مارکیٹ میں موجود یہ آرٹسٹ ان بازاروں کا حسن ہیں، تو یہ غلط نہ ہو گا۔ ان آرٹسٹوں نے اس وقت سے ان علاقوں میں بیٹھنا شروع کیا،جب زیب النساء اسٹریٹ ’’الفنسٹن اسٹریٹ‘‘ کہلاتی تھی۔ زینب مارکیٹ میں موجود ایم ظفر نامی آرٹسٹ نے کا کہنا ہے کہ وہ گذشتہ 30 برسوں سے یہاں موجود ہے۔ انہوں نے بتایا کہ 80ء کی دہائی ہمارے لئے سنہری دور تھا جب غیر ملکی سیاح بڑی تعداد میں کراچی آتے تھے اور ان سے تصاویر بھی بنواتے تھے۔ انہوں نے کہا کہ غیر ملکی ایئر لائنز کا عملہ خاص طور پر ان سے تصاویر اور اسکیچز بنواتا تھا۔ انہوں نے کہا کہ عرب ممالک سے آنے والے سیاح اور دیگر غیر ملکی بحری جہازوں کا عملہ کراچی کے اسٹریٹ آرٹسٹوں سے اپنی تصاویر بنوانے کو ترجیح دیتے تھے۔ انہوں نے کہا کہ ماضی میں کراچی روشنیوں کا شہر تھا اور صدر کا علاقہ خصوصاً زیب النساء اسٹریٹ پر اندرون ملک اور بیرون ممالک سے آنے والے سیاحوں کی توجہ کا مرکز تھی، جہاں بڑی تعداد میں وہ کراچی میں موجود سیاحتی مراکز کی سیر کے علاوہ زیب النساء اسٹریٹ پر موجود آرٹسٹوں سے اپنی تصاویر اور اسکیچز بنوانا پسند کرتے تھے۔ انہوں نے بتایا کہ ایک مرتبہ انہوں نے بیرون ملک جانے کی تیاری کر لی تھی، مگر پھر خیال آیا کہ ہمارے اپنے ہی ملک میں ہمیں اچھی اور باعزت روزی مل رہی ہے، تو پھر بیرون ملک جانے کی کیا ضرورت ہے، جس کے بعد انہوں نے اپنا ارادہ ترک کر دیا۔ زیب النساء اسٹریٹ پر موجود 75 سالہ ایس قمر نامی آرٹسٹ نے بتایا کہ وہ اپنے خاندان کے ہمراہ 1947ء میں کانپور سے ہجرت کر کے کراچی آیا تھا اور قریباً تین دہائیوں سے زائد عرصے سے زیب النساء اسٹریٹ کی فٹ پاتھ پر بیٹھ کر تصاویر اور اسکیچز بنا رہا ہے۔ انہوں نے بتایا کہ انہوں نے فن ِ مصوری اپنے ماموں سے سیکھی، جو اس زمانے میں شہر میں چلنے والی ٹراموں اور بسوں پر مختلف کمپنیوں کی پروڈکٹس کی پینٹنگز کرتے تھے، ان کی صحبت میں ہی انہوں نے یہ فن سیکھا۔ انہوں نے بتایا کہ ہمارے پاس آرٹ کی کوئی باقاعدہ ڈگری نہیں ،مگر بہت سے ڈگری یافتہ فائن آرٹ کے شعبے سے منسلک افراد اور طالب علم امتحانات اور نمائشوں میں رکھنے کے لئے ہم سے اپنے نام پر پورٹریٹ بنواتے ہیں۔ایس قمر کی لاجواب پینٹنگز واٹر کلر، چارکول اور آئل پینٹ سے بنی ہوئی ہیں۔ ان کے ہاتھ سے بنائے ہوئے کچھ پورٹریٹ کیمرے سے بنائی گئی تصاویر محسوس ہوتے ہیں۔ انہوں نے قائداعظمؒ اور دیگر قومی رہنماؤں کے علاوہ بے نظیر بھٹو کا بھی خوبصورت پورٹریٹ بنایا ہے۔ زیب النساء اسٹریٹ پر گذشتہ 16 برس سے موجود اسٹریٹ پورٹریٹ آرٹسٹ 53 سالہ محمد عارف نے کہا کہ ہمارے پاس پین انک اسکیچ اور چارکول کا کام زیادہ ہوتا ہے۔ انہوں نے کہا کہ پورٹریٹ آرٹ میں اس کا کوئی استاد نہیں ، وہ پیدائشی آرٹسٹ ہے۔ان کا کہنا تھا کہ مجھے بچپن ہی سے تصویریں بنانے کا شوق تھا اور وقت کے ساتھ ساتھ میری فنکارانہ صلاحیتیں بھی میری طرح بالغ ہوتی گئیں۔ انہوں نے کہا کہ 80ء کی دہائی میں کراچی کا ماحول دبئی جیسا تھا، اس دور میں شہر کا کوئی بھی آرٹسٹ بیروزگار نہیں ہوا کرتا تھا۔ انہوں نے بتایا کہ وہ اقبال مہدی، گل جی سے بہت متاثر ہیں، انہیں ان آرٹسٹوں کی پینٹنگز نے ہمیشہ متاثر کیا ہے۔ انہوں نے کہا کہ سیاحت ہی ہمارا مستقبل ہے۔ پاکستان سیاحت کی بڑی صنعت کی حیثیت رکھتا ہے۔ شہر میں امن و امان کے مسئلے نے اس صنعت کو متاثر کیا ہے۔ بہرحال اب حکومتی اقدامات سے بہتری آ رہی ہے اور مثبت نتائج ملنے کی امید پیدا ہو گئی ہے۔ مذکورہ اسٹریٹ پورٹریٹ آرٹسٹوں کی بنائی ہوئی پینٹنگز میں ان کے فن کی پختگی اور بہترین تخیل کی جھلک نمایاں ہے۔ فن کی پختگی تجربے سے ہی آتی ہے اور اسٹریٹ پر ہونے کی وجہ سے ان کی پریکٹس بھی دوسرے آرٹسٹ سے کہیں زیادہ ہے۔ لوگوں میں مصوری یا پورٹریٹ آرٹ کا ذوق کم ہونے سے اب آرٹسٹوں کی پذیرائی صادقین، گل جی اور دیگر آرٹسٹوں جیسی نہیں رہی، جس سے فنون ِلطیفہ کے اس شعبے کا حسن متاثر ہوتا ہوا نظر آ رہا ہے۔ فن میں پختگی کے لئے اچھی پریکٹس کا ہونا بہت ضروری ہے۔ بہرحال اس بات سے انکار نہیں کیا جا سکتا کہ سیاحت کی ترقی آرٹ کے فروغ کی ضمانت ہے۔ ہمارے یہاں بہترین آرٹسٹ ہیں اور اچھا آرٹ تخلیق ہوتا ہے، مگر اس شعبے کی ترقی کے لئے سیاحت کے شعبے کو خصوصی توجہ دینے کی ضرورت ہے، جس سے ملک کے دیگر علاقوں میں موجود آرٹسٹ بالخصوص پورٹریٹ آرٹسٹوں کو فائدہ ہو گا، جو کراچی اور لاہور کے ساتھ ملک کے دیگر شہروں اور تفریح مقامات پر جا کر اپنے لئے اچھے روزگار کا بندوبست کر سکیں گے۔ آرٹسٹ کو صرف سرٹیفکیٹس اور ایوارڈز تک محدود نہ رکھا جائے بلکہ انہیں روزگار وسیع کرنے کے مواقع بھی فراہم کئے جائیں، اس کے علاوہ فائن آرٹس کے کالجز اور دیگر اداروں کو بھی تجربہ کار اور اچھی پریکٹس کے حامل آرٹسٹوں کی خدمات حاصل کرنے کی ضرورت ہے تاکہ طلبہ اسٹریٹ آرٹسٹوں سے اپنے نام پر پورٹریٹ بنوانے کی بجائے خود ایسے پورٹریٹ بنا سکیں۔ (تصاویر: صاحب زمان) ٭…٭…٭