شوگر فری مشروبات سے مٹاپا

شوگر فری مشروبات سے مٹاپا

اس بات کا علم میں آنے کے بعد کہ کولڈ ڈرنکس کی ایک عام رنگین اور سفید بوتل میں 9۔ 10 چائے کے چمچے چینی شامل ہوتی ہے۔ مصنوعی مٹھاس (ڈائٹ) کی بوتلوں کا استعمال عام ہو رہا ہے، لیکن ٹیکساس یونیورسٹی کے ہیلتھ سائنس سینٹر میں ہونے والے ایک مطالعے کے مطابق شوگر فری کولڈ ڈرنکس پینے والے، دبلے ہونے کے بجائے نسبتاً دیر سے موٹے ہو جاتے ہیں۔ معالجین نے 1550 مرد اور خواتین کے جائزے کے بعد بتایا ہے کہ روزانہ دو یا اس سے زیادہ شوگر فری کولڈ ڈرنکس پینے والوں کے وزن میں آٹھ سال کے اندر 57 فی صد اضافہ ہو گیا جبکہ معمول کے کولڈ ڈرنکس پینے والوں کے وزن میں اضافے کی شرح 47 فی صد رہی۔ تحقیق کرنے والوںکے مطابق دراصل شوگر فری کولڈ ڈرنکس پینے والے یہ محسوس کرتے ہیں کہ چونکہ وہ اس طرح زائد حراروں سے بچ رہے ہیں، اس لئے ڈٹ کر کھاتے ہیں۔ اس طرح زیادہ حراروں کی وجہ سے ان کا وزن بڑھ جاتا ہے۔ ادھر کی کسر ادھر پوری ہو جاتی ہے۔ یہ بھی دیکھا گیا ہے کہ شوگر فری کولڈ ڈرنکس پینے والے شکر والی بوتلیں پینے والوں کے مقابلے میں پیزا زیادہ کھاتے ہیں۔ مشورے کے مطابق مناسب یہ ہے کہ ہر قسم کے کولڈ ڈرنکس سے پرہیز کیا جائے۔