پاکستان دشمنوں کی تلاش میں

**intelligent086** · 05-14-2015, 09:44 AM

شکر ہے زیادہ دور نہیں جانا پڑا، ہم نے کابل جا کر اپنے قریب تریں ہمسائے میں ایک نیا د شمن تلاش کرلیا۔ہم افغانستان کے دورے کرتے ہی رہتے ہیں،پہلے زرداری صاحب گئے، پیچھے پیچھے وزیر اعظم اورا ٓرمی چیف بھی گئے، اعلان ہوا کہ افغانستان کا دشمن ہمارا دشمن ہے اور دونوںملک پاکستانی طالبان اور افغان طالبان کے خلاف متحد ہو کر لڑیں گے، پتہ نہیں ، افغان صدر نئی دہلی گئے تھے تو کیا اعلان کر آئے۔اور جب افغان صدر پاکستان آتے ہیں تو کیا اعلان کرتے ہیں۔ہماری افغان پالیسی کافی ڈانواں ڈول رہی ہے۔ سوویت روس نے افغانستان میں قدم رکھے تو ہم نے دنیا کی اس کمیونسٹ سپر پاور کے خلاف طبل جنگ بجا دیا ۔اور دم اس وقت لیا جب سوویت روس پارہ پارہ ہو گیا۔وہ دن اورا ٓج کا دن، چین ہمیںبھی نہیں آیا، کلاشنکوف مافیا ، ہیروئن مافیا ، فرقہ واریت اور جہادی عناصر نے ہمار اناک میں دم کر رکھا ہے۔تیس چالیس لاکھ افغان مہاجرین کو ہم گلے لگائے بیٹھے ہیں، انہوںنے قیام و طعام کے لئے پاکستان کو پسند کر لیا، یہیں شادیاں رچائیں ، کاروبار جمائے۔ شناختی کارڈ بنوائے، پاسپورٹ لئے اور جو فارغ تھے ، وہ ہمارے خون کے پیاسے ہو گئے، بارہ برسوں میں ساٹھ ہزار معصوم پاکستانیوں کی جان چلی گئی، ہماری معیشت کا چراغ گل ہو گیا۔ہماری فوج نے ان عناصر کی بیخ کنی کے لئے اپنا خون دیا، اب کچھ ادھر سے چین آیا تھا کہ ہم افغان طالبان کو للکار رہے ہیں۔کیوں ، اس کی وجہ سمجھ نہیں آئی، بس وزیر اعظم نے اعلان کر دیا اور ہم نے آمنا و صدقناکہہ دیا۔ مگر اس اعلان کے اثرات کا جائزہ بھی لے لیا ہوتا، افغان طالبان پر ہم کس بنا پر چڑھ دوڑیں گے، کیا وہ اس ملک کی جائز حکومت نہیں تھے۔صرف یہ کہ امریکہ نے انہیں دہشت گرد کہہ دیا۔ اس بنا پر کہ انہوںنے اسامہ بن لادن کو امریکہ کے حوالے کرنے سے یہ کہہ کر انکار کیا تھا کہ اگر اس پر کوئی مقدمہ چلانا ہے تو افغان سرزمین پر چلے گا، امریکہ سارے ثبوت اس کی عدالت میںلا کر پیش کر دے۔ دنیا بھر میں یہی وطیرہ ہے کہ جس سرزمین پر جرم سرزد ہو گا، مقدمہ اسی ملک کے قانون کے تحت اسی ملک کی عدالتوںمیں چلے گا۔ نائن الیون کے سانحے میں افغانستان کا براہ راست کوئی قصور نہ تھا، تمام ملزم مبینہ طور پر عرب ممالک سے تعلق رکھتے تھے۔امریکہ نے طالبان حکومت کے اس موقف کو قبول نہ کیا اور سلامتی کونسل کی ایک پرانی قرار داد کی آڑ میں افغانستان کی ٹھکائی کر دی۔اب امریکہ تھک ہار کر جا رہا ہے اور طالبان کے خلاف لڑائی میں ہمیںجھونکنا چاہتا ہے، مگر کیوں،اگر ہم نے ابھی ابھی یمن کی لڑائی کو پرائی آگ کہا، ہماری پارلیمنٹ نے ٹھونک بجا کر فیصلہ سنایا، امارات کے وزیر نے ہمیںبے نقط سنائیں، سعودی عرب کو بھی ضرور طیش آیا ہو گا، مگر ہم نے اپنافیصلہ نہیں بدلہ ا ور پرائی آگ میں کودنے کے لئے تیار نہیںہوئے، یمن کی جنگ پرائی آگ ہے تو افغانستان کی جنگ ہماری آگ کیسے ہو گئی۔اگر ہم افغانستان میں فوج جھونکنے کے لئے تیار ہیں تو اس سے پہلے حرمین شریفین کے محافظوں کی آواز پر لبیک کہنا ضروری ہے، اس سے ہم کیوں کتراتے ہیں۔ ظاہر ہے پہلا حق افغانستان کا نہیں، سرزمین حجاز مقدس کا ہے، اور اگر ہم اپنی ترجیحات پر غور کریں تو ہمارا پہلا فریضہ کشمیر کو بھارت کے چنگل سے آزاد کرانا ہے، جہاں کے عوام آج بھی پاکستان زندہ باد کے نعرے لگاتے ہیں اور پاکستان کا پرچم لہراتے ہیںا ور اس کی پاداش میں ضعیف اور بیمار حریت پسندرہنما علی گیلانی کو قید و بند کا سامنا کرناپڑتا ہے۔مگر ہم پر تو افغان طالبان کا بھوت طاری ہے اور ہمیں افغانستان سے عشق ہو گیا ہے، کشمیر بھول گیا ہے۔افغانستان کا بھوت ہمیشہ ہمارے سروں پر چھایا رہا۔ مگر یہی طالبان تھے جن کو محترمہ بے نظیر بھٹو نے اپنے بچے کہا تھا اور ان کے وزیر داخلہ جنرل نصیرا للہ بابر خود کابل جا کر انہیں تخت پر بٹھا کر آئے تھے۔ہمارے مذہبی اسکالر مولانا سمیع الحق نے بھی طالبان کو اپنے بچے کہا تھاا ور وہ ایسا کہنے میں حق بجانب تھے کیونکہ یہ انہی کے مدرسہ حقانیہ کے طالب علم رہے تھے۔نائن الیون کے بعد ہم انہی طالبان کے خون کے پیاسے ہو گئے، ہم نے سفارتی آداب کو بالائے طاق رکھا اور افغان سفیر ملا ضعیف کو امریکہ کے حوالے کیا ، وہ انہیںگوانتا نامو لے گیا۔پتہ نہیں مختلف پاکستانی حکومتوں نے مختلف ادوار میں مختلف قوموں اور ملکوں کے ساتھ جو ناروا سلوک روا رکھا ہے، اس کے بعد ہمارے اوپر بھروسہ کون کرتا ہے اور کیوں کرتا ہے۔میںنہیں سمجھتا کہ ہم پوری طرح پاکستانی طالبان سے اپنے آپ کو محفوظ کر پائے ہیں۔ان سطور کو قلم بند کرتے ہوئے کراچی کا جو حال ہو رہا ہے، وہ اٹھارہ سو ستاون کے غدر سے بدتر ہے۔تاریخ پکار پکار کر کہہ رہی ہے، تجھ کو پرائی کیا پڑی ، اپنی نبیڑ تو۔مگر ہم نت نئے دشمنوں کی تلاش میں سرگرداں ہیں۔ہم شاید ڈھیر سارے دشمنوں کے بغیر نچلے نہیںبیٹھ سکتے۔کیا ہی اچھا ہوتا کہ کابل اعلامیہ میں اگر افغانستان نے اپنے طالبان کا ذکر اپنے دشمن کے طور پر کیا ہے تو اس اعلامیہ میں بھارت کا نام لے کر اسے پاکستان کا دشمن کہنا چاہئے تھا اور دونوں ملک اسے اپنامشترکہ دشمن کہتے۔مگر یہی افغان صدر ابھی ابھی دلی ہو کرا ٓئے ہیں ،ابھی تو ان کے اعلامیوں کی سیاہی خشک نہیں ہونے پائی۔ آخر یہ افغان حکومت دھوکہ دے رہی ہے تو کسے، کیا وہ پاکستانیوں کو بیوقوف سمجھتی ہے یا ہم بیوقوف بننے کے لئے تیار ہیں۔ایک طرف پاکستانی طالبان، دوسری طرف افغان طالبان اور تیسری طرف کور کمانڈرز کہتے ہیں کہ را، را، را۔تو اس صورت حال میں ہم کیوں سینڈ وچ بن رہے ہیں۔یا ہم چومکھی لڑائی کے فن کی مہارت دکھانا چاہتے ہیں۔ہم کسی معاملے میں قناعت پسند قوم نہیں، ہماری خواہش ہے کہ نت نئے محاذکھلیں۔لہو گرم رکھنے کا کوئی نہ کوئی بہانہ ضرور چاہتے ہیں۔آفریں ہے اس قوم کی بہادری کی، استقلال کی،دلیری کی، حوصلے کی، قربانی کے جذبے کی۔