ہیئر فال

**intelligent086** · 10-28-2014, 08:10 AM

آج کل کے اہم ترین مسائل میں سے اُبھرتا ہوا ایک مسئلہ بالوں کے گرنے کا ہے۔ جیسا کہ ہم سب جانتے ہیں کہ کسی بھی انسان کی شخصیت کے اُبھار میں جتنا کردار چہرے کی خوبصورتی کا ہے اُس سے کہیں زیادہ اہمیت بالوں کی ہے۔ بالوں کی خوبصورتی انسان کی شخصیت کو پُرکشش بناتی ہے تو دوسری طرف بالوں کے گرنے سے انسان کی شخصیت ادھوری سی ہو کر رہ جاتی ہے۔ خواتین روزمرہ کے معمولات میں اس قدر مشغول ہو جاتی ہیں کہ وہ اپنی غذائیت میں موجود اشیاء پر توجہ دینا بھول جاتی ہیں ۔ ہیئرفال کی سب سے اہم وجوہات میں سے ایک وجہ غذائیت کی کمی ہے۔ آج کل فاسٹ فوڈ اور ٹِن پیک فوڈز کا استعمال فیشن بن چکا ہے جبکہ لوگوں میں اس بات کا شعور نہیں ہے کہ یہ تمام اشیاء غذائیت اور طاقت سے محروم ہوتی ہیں۔ روزمرہ خوراک میں ضروری ہے کہ وٹامن اور آئرن کی ایک خاص مقدار موجود ہو ۔خاص طور پر وہ خواتین جو کہ شادی شدہ ہیں‘ اُن میں حمل کے دوران اور اس کے بعد کے دورانیے میں آئرن کی کمی پیدا ہو جاتی ہے جس کے باعث بالوں کا گرنا معمول بن جاتا ہے‘ ایسی حالت میںانتہائی ضروری ہے کہ آئرن کی کمی کو فوری طور پر ختم کیا جائے کیونکہ آئرن کی قلت کے باعث نہ صرف ہمارے بال بلکہ جلد بھی متاثر ہوتی ہے۔ جلد پر چھائیاں اور کالے دھبے سامنے آتے ہیں لہٰذا طاقت ور بالوں کیلئے غذائیت سے بھرپور خوراک کھانا بے حد ضروری ہے۔ انسانی جسم میں ایک بار آئرن کی کمی ہو جائے تو اس کو پورا کرنے میں کم از کم ڈیڑھ سال کا دورانیہ درکار ہوتا ہے کیونکہ روزمرہ کھائی جانے والی خوراک میں سے صرف 10% آئرن روزانہ جسم کے نظام انہضام سے جذب کی جا سکتی ہے۔ چنانچہ آئرن کی قلت کے پیدا ہونے سے پہلے ہی ضروری ہے کہ احتیاط کی جائے۔ آئرن کے لیول کو بڑھانے کیلئے اپنی غذا میں پالک، سیب، انڈے، گوشت کا استعمال بڑھائیں۔ یہ جسم کو آئرن فراہم کرنے کے اہم ذرائع ہیں۔ خواتین بالوں کے گرنے کے باعث پریشان تو رہتی ہیں لیکن وہ بالوں کے گرنے کی وجوہات سے انجان رہتی ہیں۔ لڑکیوں میں خون کی کمی ایک ایسا مسئلہ ہے جس کے باعث بہت تیزی سے بال گرنے لگتے ہیں۔ اس لئے بالوں کیلئے اچھے شیمپو اور سیرم کا استعمال ضروری ہو جاتا ہے۔ بالوں کی نشوونما اور چمک کو برقرار رکھنا اور گھنے بالوں کی صحت کیلئے نہ صرف اس بات کی ضرورت ہے کہ غذا کو بہتر بنایا جائے بلکہ ساتھ ہی سطحی طور پر اچھی کوالٹی کے سیرم اور شیمپو کا استعمال ضروری ہے۔ چند خواتین میں بال گرنے کی وجہ بالوں میں ناقص ڈائی کا استعمال بھی ہو سکتا ہے تو ایسی خواتین کیلئے ضروری ہے کہ وہ اچھی کوالٹی کے ہیئرڈائی استعمال کریں۔ خواتین کے علاوہ مردوں میں بھی بالوں کے گرنے کا مسئلہ بڑھ رہاہے لیکن غذائیت کی کمی کے علاوہ مردوں میں یہ مسئلہ ہارمون کی مقدار کی کمی بیشی کے باعث بھی سامنے آتا ہے۔ مردوں کے جسم میں پیدا ہونے والے خاص ایک ہارمون کی قلت کے باعث مردوں کے بال جھڑنا شروع ہو جاتے ہیں‘ایسے افراد میں مرغی کا زیادہ استعمال اور چند ادویات اس مسئلے کو حل کرنے میں معاون ہیں۔ آج کل ہیئر ٹرانسپلانٹ بھی ایک بہتر اور جدید حل ہے جو کہ بہت سے لوگوں کی شخصیت کو اُبھارنے میں مددگار ثابت ہوا ہے۔ اس عمل کیلئے صرف ایک دن کا وقت درکار ہوتا ہے۔ یہ ایک سرجیکل عمل ہے جس میں سر کی جلد کے ایک حصے سے پیچ لے کر جلد کی اس سطح پر لگا دیا جاتا ہے جہاں بالوں کی کمی ہوتی ہے۔ اس عمل کے بعد کسی قسم کی تکلیف کا سامنا نہیں ہوتا اور اس کے ذریعے سے بالوں کی نشوونما بالکل قدرتی طور پر رونما ہوتی ہے لیکن وہ افراد جو ان تمام مسائل سے بچنا چاہتے ہیں اور اپنے بالوں کو خوبصورت اور بڑھتا ہوا دیکھنا چاہتے ہیں‘ ان کیلئے ضروری ہے کہ وہ آئرن کی مقدار کو برقرار رکھنے پر توجہ دیں۔ اس کے ساتھ ساتھ خوراک میں غذائیت کو بھرپور بنائیں ۔ آئرن اور ملٹی وٹامن سپلیمنٹ کا استعمال آئرن کی قلت کو پورا کرنے کیلئے معمول بنالیں۔ خواتین دورانِ حمل بال گرنے کے ساتھ جسم میں درد اور پٹھوں کے کھنچائو کی شکایت کے ساتھ تشریف لاتی ہیں۔ اُن کے شعور کیلئے ضروری ہے کہ انہیں بتایا جائے کہ یہ تمام مسائل آئرن کی قلت کے باعث درپیش آتے ہیں‘اس لئے اس دوران آئرن اور فولک ایسڈ لینا بے حد ضروری ہے۔ آئرن جہاں ایک طرف حاملہ خاتون کے جسم میں موجود خون کی گردش کو مؤثر بناتا ہے ہاں دوسری طرف بچے کی نشوونما کیلئے معاون رہتا ہے۔ حمل کے دوران خواتین اس بات پر بالکل توجہ نہیں دے پاتیں کہ ان کی جلد اور بال بُری طرح متاثر ہوتے ہیں تو خواتین کو چاہیے کہ اپنی خوبصورتی کو چار چاند لگانے کیلئے اپنے بالوں پر خاص توجہ مرکوز رکھیں۔ روزمرہ معمولات میں فاسٹ فوڈز اور ٹِن پیک اشیاء سے بہتر ہے کہ تازہ پھل اور سبزیاں اپنی خوراک کا حصہ بنائیںجو کہ ہر طرح سے خوبصورتی اور اچھی صحت کے حصول میں معاون ثابت ہوں گی۔ زِنک اور ملٹی وٹامن آسان ذرائع ہیں جن سے گرتے ہوئے بالوں کو روکا جا سکتا ہے ۔ ٭…٭…٭