Khud apne liye baith ke sochenge kisi din
Yoon hai ke tujhe bhool ke dekheinge kisi din
Bhatke hue phirte hai kai lafz jo dil me
Duniya ne diya waqt to likheinge kisii din
Hil jaayeinge ik baar to arsho ke dar-o-baam
Ye Khaak_nashi log jo boleinge kisi din
Aapas ki kisi baat ka milta hi nahi waqt
Har baar ye kahte hai ke baitheinge kisi din
Ai jaan teri yaad ke be-naam parinde
Shaakho pe mere dard ki utareinge kisi din
Jaati hai kisi jheel ki gahraai kaha tak
Aankho me teri Doob ke dekheinge kisi din
Khushboo se bhari shaam me jugnoo ke qalam se
Ik nazm tere waaste likkheinge kisi din
Soyeinge teri aankh ki Khilwat me kisi raat
Saaye me teri zulf ke jaageinge kisi din
Khushboo ki tarah ,asl-e-sabaa Khaak numaa se
Galiyo se tere shahar ki guzareinge kisi din
‘Amjad’ hai yahi ab ke kafan baandh ke sar se
Us shahar-e-sitam_gaar me jaayeinge kisi din
