Huge Collection Of Ashars

وہ کچھ اس طرح بھی تقدیر بنا دیتا ہے
درد کی روح کو جاگیر بنا دیتا ہے

اک مسیحائی اتر آتی ہے شعروں میں میرے
کوئی الفاظ کو تاثیر بنا دیتا ہے

نقش کرتا ہے اجاگر میری آوازوں کے
بات کرتا ہوں تو تصویر بنا دیتا ہے

آنکھ معصوم ہے لیکن کوئی کرنی والا
ہدف دل کے لیے تیر بنا دیتا ہے

گھیر لیتا ہے نشانات قدم بھی فرحت
عشق کو حلقہ زنجیر بنا دیتا ہے

موت کا اعتبار کر لیتے
دو گھڑی انتظار کر لیتے

درد منہ پھیر کر نہیں جاتا
درد ہی اختیار کر لیتے

لوٹ کر پھر یہی ہوا ہوتا
تم کسی سے بھی پیار کر لیتے

اے میرے دل کبھی کبھی کوئی
شام ہی خوشگوار کر لیتے

جھوٹ کی نوکری سے بہتر تھا
خود کو بے روزگار کر لیتے