شیکسپیر
شفق صبح کو دریا کا خرام آئینہ
نغمۂ شام کو خاموشی شام آئینہ
برگ گل آئنۂ عارض زبیائے بہار
شاہد مے کے لیے حجلۂ جام آئینہ
حسن آئنۂ حق اور دل آئنۂ حسن
دل انساں کو ترا حسن کلام آئینہ
ہے ترے فکر فلک رس سے کمال ہستی
کیا تری فطرت روشن تھی مآل ہستی
تجھ کو جب دیدۂ دیدار طلب نے ڈھونڈا
تاب خورشید میں خورشید کو پنہاں دیکھا
چشم عالم سے تو ہستی رہی مستور تری
اور عالم کو تری آنکھ نے عریاں دیکھا
حفظ اسرار کا فطرت کو ہے سودا ایسا
راز داں پھر نہ کرے گی کوئی پیدا ایسا
