سید الشہداء حضرت امیر حمزہ

سید الشہداء حضرت امیر حمزہ

http://dunya.com.pk/news/special_fea..._EOpN-2G1K.jpg

صاجزادہ ذیشان کلیم معصومی
حضور پاک ؐ اپنے چچا کی شہادت پر اس قدر روئے کہ کبھی پھر آپؐ کو اس قدر روتے نہیں دیکھا گیا آپؓ کی شہادت کا غم عہد نبوی ؐ سے ہی اہل مدینہ کی قدیم روایت اور عقیدت میں شامل ہے *********** سید الشہداء سیدنا حضرت امیر حمزہ ؓ اسلام کے ان جانثاروں میں سے ہیں جن کی خدمات مینارہ نور اور روز روشن کی طرح عیاں ہیں۔ جب تک آپؓ حیات رہے سرکاردوعالم ؐکے نائب کا کردار ادا فرمایا ۔غزوہ احد وبدر میں آپؓ اسلامی لشکر کے سالار رہے ،بعثت کے چھٹے سال سے لیکر 3ہجری تک،اعلان اسلام سے لیکر غزوہ احد میں سید الشہداء کا بلند مقام ملنے تک آپؓ کی پوری حیات حفاظت مصطفی کریمؐ ؐمیں بسر ہوئی اور آپؓ کو اس رفاقت پہ بڑا ناز تھا۔ صاحبان طریقت کے نزدیک سیدنا حضرت امیر حمزہؓ کا دربار رسالت مآب ؐمیں بہت ہی بلند مقام و مرتبہ ہے۔ دور نبویؐ میں بھی صحابہ کرامؓ نبی پاکؐ ؐکے بعد رہنمائی کیلئے آپؓ سے رجوع کیا کرتے تھے۔ سیدناحضرت عبدالمطلب کی ساری اولاد دین حنیف پر تھی اور انہیں اس بات پر بڑا فخر تھا کہ سیدناحضرت ابراہیم علیہ السلام کی اولاد میں سے اور سرکاردوجہاں ؐکی ملت میں سے ہیں۔ حضرت امیر حمزہ ؓ بھی اپنے آبائواجداد کے دین پر تھے جن کے بارے میں خود خدا پاک نے اپنے لاریب کلام مقدس میں ارشاد فرمایا کہ’’ وہ سب سجدے کرنے والے تھے۔‘‘ آپؓ اعلان اسلام سے قبل بھی کبھی بت پرستی کے نزدیک نہ گئے۔ شراب ،جوا،اور دیگر امور سے آپؓ کوسوں دور تھے آپؓ کا شوق پہلوانی اور شکار تھا ۔حضرت امیر حمزہ ؓ امام المجاہدین اور سید الشہداء کے بلند مقامات پر فائز ہیں۔ آپ ؓکی تلوار انتہائی منفرد ،دو دھاری اور انتہائی بھاری تھی اور اس تلوار کا وار رک نہ سکتا تھا۔ اگر سیدھی پڑتی تو ڈھال کوکاٹ دیتی کیونکہ اتنی بھاری تلوار کو روکنا ڈھال کا کام نہیں اور دودھاری ہونے کی وجہ سے اگر لوٹ آتی تو چلانے والے کو دو لخت کر دیتی تھی۔ آپؓ سے زیادہ زور آور کوئی نہ تھا جو ان کی تلوار واپس پلٹا سکتا اور نہ ہی ان کی تلوار کبھی واپس پلٹتی تھی۔ حقیقت میں آپؓ جیسا نہ کوئی طاقتور تھا اور نہ کوئی بہادر تیغ زن تھا، یہی وجہ ہے کہ آپؓ کی تلوار آپؓ کے بعد کوئی بھی نہ چلا سکا اور اکثر تو اسے اٹھا بھی نہیں سکتے تھے شمشیر زنی کی ہزاروں برس کی تاریخ میں کوئی بھی حضرت امیر حمزہ ؓ کا ثانی نہیں ملتا اور ملتا بھی کیسے کیوں کہ آپؓ اللہ اور اسکے رسول پاک ؐکے شیر تھے۔ عشق رسول کریم ؐآپؓ کی حیات کا مرکز و محور تھا ،آپ ؓنے اپنی تمام زندگی حضور پاکؐ کے قدموں میں وار دی اور ابدی حیات پائی ۔ جو محبت آقائے کائناتؐ کو حضرت سیدنا امیر حمزہؓ سے تھی ویسی کسی اور سے نہ تھی۔ جب غزوہ احد ختم ہوا تو مدینہ کی عورتیں آئیں اور اپنے اپنے شہداء کا نوحہ کرنے لگیں ۔ آپ ؐنے فرمایا کہ ’’امیر حمزہ ؓ کا نوحہ کون کرے گا؟ ‘‘یہ سن کر انصار نے اپنی عورتوں کو اپنے شہداء کا نوحہ کرنے سے روک دیا اور حضرت امیر حمزہ ؓ کا نوحہ کرنے کا حکم دیا ۔سب نے مل کر سید الشہداء کا نوحہ کیا ۔اس کے بعد مدینہ میں یہ رسم پڑ گئی کہ جب بھی کوئی فوت ہوتا تو اس کی میت پر اظہار غم کرنے سے پہلے سیدنا حضرت امیر حمزہ ؓ کا نوحہ کیا جاتا تھا ۔ صدیوں تک مدینہ منورہ میں یہ رسم رہی کہ مسلمان سرکاردوعالم ؐکے غم کو اپنے غم پر ترجیح دینے لگے۔ اللہ کے رسول برحق ؐ کو حضرت حمزہ ؓ کے وصال کا غم تا دم وصال رہا۔ آپؐ ہر سال تاریخ مقرر فرما کر جبل احد پر جاتے ، صحابہؓ کو بھی ساتھ لے جاتے اور ہر سال دن مقرر کر کے حضرت امیر حمزہ ؓ سمیت سب شہداء احد کیلئے دعا فرمایا کرتے۔ یہ اس محبت کا مظہر ہے جو اللہ کے رسول کریم ؐ کو اپنے پیارے چچا سیدنا امیر حمزہ ؓ سے تھی اور بلاشبہ حضرت حمزہ ؓ سرکار دوعالم ؐ کی اس محبت کے اہل بھی تھے ،گویا حضرت حمزہؓ کی محبت ہرصاحب ایمان کیلئے لازم ہے ۔آپؓ کی شہادت کا غم عہد نبوی ؐ سے ہی اہل مدینہ کی قدیم روایت اور عقیدت میں شامل ہے۔ اہل مدینہ کی یہ بھی روایت ہے کہ وہ باقاعدگی سے سیدنا حضرت امیر حمزہؓ کی قبر انور پر جاتے، سلام پیش کرتے۔ آج بھی عشاق کرام کی ان کی قبر اقدس پر حاضری کیلئے ہر بدھ کافی تانتا بندھا رہتا ہے۔ قریش مکہ رسولؐ خدا کی عداوت میں پاگل ہورہے تھے۔ ایک دن سرکاردوعالم ؐ کوہ صفا یا اس کے دامن میں جلوہ افروز تھے کہ ابو جہل اس طرف آنکلا، اس نے آپؐ کو نازیبا الفاظ کہے آپؐ نے جب اسکی بے ہودہ گوئی کا جواب نہ دیا تو اس نے ایک پتھر اٹھا کر آپ ؐکو دے مارا آپؐ زخمی ہو گئے، خون مبارک بہنے لگا۔ آپؐ خاموشی سے اپنے گھر کی طرف روانہ ہو گئے ۔ اس گستاخی کے بعدابوجہل صحن کعبہ میں آبیٹھا جہاں کچھ لوگ بیٹھے باتیں کر رہے تھے۔ حضرت حمزہ ؓ کی عادت تھی کہ روزانہ تیر کمان لیکر جنگل کی طرف نکل جاتے اور شکار کرکے شام کو طواف کعبہ کرکے اپنے گھر چلے جاتے ۔ آپؓ حسب معمول جب شکار سے واپس آئے تو ابو جہل کی لونڈی ملی، اس نے ابو جہل کا سرکاردوعالم ؐکی شان اقدس میں بد زبانی کرنا اور پتھر مارنا اور سرکار ؐ کا خاموشی سے گھر آجانے کا سب حال آپؓ کو بیان کر دیا۔ حضرت امیر حمزہ ؓ کو جوش آیا، خانہ کعبہ گئے ،طواف سے فارغ ہو کر سیدھے اس مجمع کی طرف متوجہ ہوئے جہاں ابوجہل باتیں کر رہا تھا۔آپؓنے جاتے ہی اس زور سے کمان اس کے سر پر ماری کہ اس کر سرپھٹ گیا اور خون بہنے لگا۔ پھر کہا’’ میں بھی محمد ؐکے دین پر ہوں، وہی کہتا ہوں جو وہ کہتا ہے اگر تجھ میں کچھ ہمت ہے تو میرے سامنے بول‘‘ابو جہل کے ساتھیوں کو غصہ آیا ،وہ اس کی حمایت میں اٹھے مگر ابو جہل آپؓ کی بہادری سے واقف تھا ۔ اس نے اپنے حمایتیوں کو یہ کہہ کر روک دیا کہ واقعی مجھ سے غلطی ہو گئی تھی۔ یہ بات ابو جہل نے ان کو سنانے کیلئے کہی تاکہ بات یہیں ختم ہو جائے۔ اس کے بعد حضرت حمزہ ؓآقا کریم ؐکے پاس آئے اور کہا ’’ بھتیجے تم یہ سن کر خوش ہو گے کہ میں نے ابو جہل سے تمہارا بدلہ لے لیا ہے‘‘ حضرت حمزہؓ کے بھرپور جواب نے مشرکین مکہ کواس قدر محتاط و مودب بنا دیا تھا کہ اب وہ سرکار ؐ کی شان میں گستاخیاںکرنے سے باز رہنے لگے۔ غزوہ احد میں آپؓ سالار لشکر تھے اور پہلی ضرب میں آپؓ نے قریش کے مشہور جنگجو سردار عتبہ اور پھر اس کے بھائی شیبہ کو بھی واصل جہنم کیا۔ جنگ احد میں آپؓ اپنی شجاعت سے اہل مکہ کا مقابلہ کرتے رہے، ہندہ بنت عتبہ نے ایک حبشی غلام جو ماہر نشانہ باز تھا سے کہا اگر تم جنگ میں امیر حمزہ ؓ کو شہید کر دو تمہیں آزاد کر دیا جائے گا۔ وہ حضرت حمزہ ؓ کا مسلسل تعاقب کر رہا تھا اورموقع کی تلاش میں تھا ،ایک مقام پر چھپ کے بیٹھ گیا۔ حضرت حمزہ ؓ مقابلہ کرتے ہوئے اسکے قریب سے گزرے تو اس نے چھپ کر نیزے سے وار کیا جو آپؓ کی ناف مبارک سے ہو کر پشت سے نکل گیا اور سیدنا امیر حمزہ ؓ نے جام شہادت کا عظیم مرتبہ پایا ۔پھر ہندہ نے آپ ؓکے جسم مبارک کی بے حرمتی کی اور آپؓ کا شکم مبارک چاک کر کے جگر کو نکالا اور چبا کر نگلنا چاہا مگر نگل نہ سکی۔ بعد میں جب فتح مکہ کے موقع پر ہندہ اور وحشی دونوں نے کلمہ پڑھا تو نبی کریم ؐنے دونوں کو حکم دیا کہ وہ کبھی آپؐ کے سامنے نہ آئیں۔ حضور پاک ؐ اپنے چچا کی شہادت پر اس قدر روئے کہ کبھی پھر آپؐ کو اس قدر روتے نہیں دیکھا گیا ۔صحابہؓ فرماتے ہیں کہ اللہ کے رسول ؐحضرت حمزہ ؓ کے جنازے کو قبلہ سمت رکھ کر بہت روئے حتیٰ کہ آپؐ کی ہچکی بندھ گئی۔ پھر سیدنا حضرت امیر حمزہؓ کو مخاطب کر کے فرمایا’’ اے حمزہ۔اے اللہ کے شیر۔اے رسولؐ کے شیر،اے حمزہ اے بھلائی کے کام کرنے والے،اے تکالیف کو دور کرنیوالے اے رسول کے چہرے کی حفاظت و حمایت کرنے والے۔‘‘ 11 شوال المکرم 3ہجری کو جنگ احد ہوئی اور یہی آپؓ کی شہادت کا مقدس دن ہے۔ آپؓ اور دوسرے شہداء کے مزارات جبل احد پر واقع ہیں جنہیںگرا کر ایک احاطے کی شکل دی گئی ہے۔ سرکار دوعالم ؐکے عاشقان آپؓ کے مزار پر حاضری دینے ضرور جاتے ہیں اور فیوض و برکات پاتے ہیں۔ اللہ آپؓ کے صدقے میں امت رسول ؐ کی بخشش کرے اور ہماری تمام مشکلات کو آسان فرمائے۔ آمین ٭…٭…٭