زندگی وقفِ خمِ گیسُوئے حالات تو ھے
اپنی قسمت میں سَحر ھو کہ نہ ھو، رات تو ھے
ورنہ یُوں راس نہ آتے مجھے ویراں لمحے
سوچتا ھُوں کہ تِرے غم میں کوئی بات تو ھے
اِس لیے دار کی ٹہنی پہ بھی خاموش ھُوں میں
خامشی کچھ بھی نہ ھو، مَقتلِ نغمات تو ھے
تجربہ کچھ بھی ھو، دل اس سے بہل جائے گا
ایک لمحے کو سہی، اُن سے ملاقات تو ھے
اے زمانے! تِری تجدید بجا ھے، لیکن
توُ بھی منجملہء اربابِ روایات تو ھے
وقت کے جبر نے بخشے ھیں کئی زخم،
مگر آدمی منتظرِ روزِ مکافات تو ھے
کیوں نہ اِس سے میں سجا لُوں غمِ ھستی محسن!
میرے اشعار میں کچھ عکسِ غمِ ذات تو ھے
