گئے دنوں کے نئے ولولے تلاش کروں

گئے دنوں کے نئے ولولے تلاش کروں

کھنچے ہوؤں سے مراسم نئے تلاش کروں

جو حرفِ حق ہے اُسے، دلنشیں بنانے کو

کچھ اور سابقے اور لاحقے تلاش کروں

میں ربط دیکھ کے سورج مکھی سے سورج کا

برائے چشم نئے رتجگے تلاش کروں

وہ جن میں جھانک کے سنبھلیں مرے نواح کے لوگ

میں اُس طرح کے کہاں آئنے تلاش کروں

جو آنچ ہی سے مبّدل بہ آب ہوتے ہیں

میں گرم ریت میں وہ آبلے تلاش کروں

بھگو کے گال، سجا کر پلک پلک آنسو

’ اُداس دل کے لئے مشغلے تلاش کروں‘

بیاضِ درد کی تزئین کے لئے ماجدؔ

وہ حرف رہ گئے جو، اَن کہے تلاش کروں

٭٭٭